NUNOT sa pagsupak, ang tanyag nga palapdan ang pagpatuman sa Cebu City Ordinance (CO) 2343 di na mahitabo.
Niadtong Abril, si Cebu City Councilor Raymond Alvin Garcia nisang-at og ordinansahon nga nag-usab sa CO 2343 diin nag-regulate sa pagbaligya ug paggamit sa plastic shopping bag matag Sabado.
Ang konseho sa dakbayan sa Sugbo nipasar sa balaod niadtong 2012 apan usa ka tuig ang nakalabay gipalapdan kini diin giapil ang Miyerkules.
Si Garcia nagtinguha nga ang plastic ban ipatuman sud sa pito ka adlaw o usa ka semana.
Gitumbok sa konsehal nga ang naghitak nga paggamit ug iresponsable nga paglabay sa mga plastic bag maoy nakabara sa drainage system sa dakbayan.
Buot usab ni Garcia nga ang mga establisemento nga may cashier lanes mohatag og “green lane” diin ilang unahon ang mga kustomer nga nagdala og sako o panapton nga bag o kaha magamit og usab nga mga sudlanan kon mag-shopping.
Ang balaudnon nakasugat sa managlahi nga panahom gikan sa mga sakop sa konseho sa dakbayan sa Sugbo atol sa ilang pinal nga pagtuki niini sa milabayng semana.
Pinaagi sa 8-5 nga buto uban sa duha ka abstentions, ang konseho sa dakbayan wa moaprobar sa ordinansahon nga gipanday ni Garcia.
Ang mga wa mobotar niini mga kasagaran sakop sa Bando Osmeña Pundok Kauswagan (BOPK) nga mga konsehal nga silang Joy Augustus Young, Sisinio Andales, Margarita Osmeña, Alvin Arcilla, Eugenio Gabuya Jr., Mary Ann delos Santos, Franklyn Ong ug Jessica Resch.
Bisan sakop sa BOPK si Konsehal Dave Tumulak mibotar pabor sa ordinansahon uban nilang Konsehal Garcia, Joel Garganera, Eduardo Rama Jr. ug Pastor Alcover Jr.
Ang sakop usab sa BOPK nga si Konsehal Jerry Guardo ug ang sa oposisyon nga si Konsehal Joy Pesquera mi-abstain.
Atol sa moabot 40 minutos nga diskusyon, si Young ug Gabuya nipadayag nga angayan aduna unay feasibility study nga pagahimuon sa naasoyng ordinansahon.
“Before we make a final decision on this one, we have to know what happened to the first ordinance, its impact,” padayag ni Young.
Alang kang Garganera, nga angayang usbon ang batasan sa katawhan.
“We’ve been public servants for the last 30 years, but where are we right now? We have to make innovative ways on how to instill discipline on the behavior towards plastic. This proposed ordinance could be a game-changing approach,” nagkanayon siya. (RTF sa Sun.Star Cebu)