KON moataki ang sakit sa kasingkasing si Neditha Maria Ariola, 57, mosangpit ug mangaliyupo sa balaang kasingkasing ni Hesus.
Sa iyang pagbisita sa relic sa wala mabungkag nga kasingkasing ni San Padre Pio sa IC3 Convention Center kagahapon sayo sa buntag, siya nag-ampo ug nagpatabang niini nga maayo ang gihambin nga balatian sanglit siya nagtuo nga ang kasingkasing sa santos sama sa kang Hesukristo.
“Kay siya’y nakadawat sa stigmata ni Jesus dihang gilansang ni sa cross. Ako nagtuo nga naa siya’y healing, ma-deepen atong faith pinaagi niya ug makaya nato ang battle sa atong pagtuo nga dili ta ma-destruct bisan sa mga nahitabo karon,” pulong ni Ariola sa iyang pagyukbo sa santos.
Nagtungha pa lang siya sa sekondarya dihang nagsugod ang iyang sakit sa kasingkasing.
Karong sunod semana, ipaubos siya sa 2D echo test aron pagsusi sa nihubag niya nga kasingkasing ug unsay angay nga buhaton.
Kuyog ni Ariola ang iyang higala nga si Maribel Paquibot, 51, kinsa nag-ampo nga himuong modelo sa kaparian ang santos pinaagi sa intercession niini aron makapadayon sa ilang bokasyon sa pagpangalagad sa katawhan ug mobarug sa mga pagtulon-an sa simbahan.
Kagahapon human sa alas 6 sa buntag nga misa panamilit sa IC3 Convention Center, gidala na ang relic sa kasingkasing ni San Padre Pio sa dakbayan sa Davao.
Sa iyang wali, si Cebu Auxiliary Bishop Dennis Villarojo nipahimug-at nga gawas sa pagpangayo og milagro sa mga tawo alang sa kaayohan sa sakit, pinaagi sa intercession ni San Padre Pio, iampo usab nila og apil ang makabaton og kinabuhi nga way katapusan.
“Eternal life is more important than surviving whatever illness we have right now. And while we pray for healing, let us also go towards that more complete healing, the total healing of transformation of ones soul and conscience,” pasabot sa obispo.
Iyang gilabtikan ang nahitabo nga pagpamatay sa Sugbo nga naglambigit og mga personalidad nga gidudahang nalambigit sa gidili nga drugas.
Iyang gisaway ang pagtuis sa hunahuna sa mga tawo aron ma-justify ang pagpamatay sa mga kriminal ug giingong mga nalambigit sa ilegal nga drugas aron magmalinawon ang nasod.
“How can this heart be acceptable, be venerated in a country whose people have no hearts for justice and righteousness, who can justify evil but a twist of their minds, tuison nato ang atong mga hunahuna, ang atong mga utok aron lang gyud pag-ingon nga okay ra na total mga dautan man na silang mga tawhana,” dugang ni Villarojo.
Siya nidugang ang wala mabungkag nga kasingkasing ni San Padre Pio nagsimbolo sa reyalidad sa langit nga dili tanan mapasabot sa natural science. (SCG)