DILI mominos P2.4 milyunes nga balor sa shabu ang nasakmit sa awtoridad samtang, 13 ka mga tawo ang nasikop sa nagkadaiyang operasyon batok sa gidiling drugas sa dakbayan sa Talisay niadtong Sabado.
Nianang pasado alas 11:00 sa gabii, nasikop si Renato Rabaya Jr., 28, sa drug bust sa Sangi, Barangay Tabunok.
Nasakmitan gikan kaniya ang 200 gramos sa shabu nga P2.3 milyones ang balor sa druga base sa Dangerous Drugs Board (DDB) value.
Ang naasoy nga operasyon gipangulohan sa Drug Enforcement Group (DEG)-Special Operations Unit 5, Regional Intelligence Division-Regional Special Operations Group ug Talisay City Police Station.
Nalakip si Rabaya sa listahan sa high value target diin naila isip miyembro sa drug group nga nagbase sa Talisay.
Sa laing operasyon sa Barangay San Roque ug Poblacion, nakasakmit ang awtoridad og 25 gramos sa shabu nga nagkantidad og P170,000 sa joint operations sa Philippine Drug Enforcement Agency 7, Talisay City Police Station ug Regional Mobile Force Battalion 7.
Duha ang nasikop nga naila nga sila sila Ruel Lape Alcantara ug Richie Cabañero.
Nasikop si Alcantara sa Sitio Dauis, San Roque sa alas 4:30 sa hapon.
Lakip sa nasikop nga mga suspetsado nga manuyopay sila si Manny Cabrera, Jimmy Nobizaga Chavez, Solimar Goenson Abastillas ug Jerome Campo Abastillas diha sa drug den ni Alcantara.
Usa ka oras ang nakalabay dihang nasikop si Cabañero sa Barangay Poblacion, diin nagsaulog sa bespiras sa kapistahan.
Nasikop usab ang mga nanuyop sa suyopanan niini sila si Filjun Mando, Eugene Cabusas, Arcel Delpino, Romeo Bacaltos, Nanette Abajon ug Dave Villarosa.
Si PSSupt Marlu Palomaria Conag, hepe sa Talisay Police Station, nagkanayon nga ang seguridad sa tanang Talisaynon ang ilang prayoridad ilabi na atol sa pagsaulog sa ilang kapistahan sa Poblacion.
“Making sure walang pakalat kalat na adik na mangugulo or mag comit ng crime during fiesta. We dismantled at least 3 major drug dens during fiesta week, arrested at least 25 potential fiesta spoilers..,” matod sa hepe.
Mag-atubang og kasong kalapasan sa Republic Act 9165 kun ang Comprehensive Dangerous Drugs Act of 2002 ang nasikop. (Dugang ni Jude Suhot Correspondent)