WALA pa magsugod ang Build-Build-Build program ni Presidente Rody Duterte nagpadayon na ang proyektong pang-imprastraktura sa dakbayan.
Bisan ang dagan sa ubang proyekto mora'g umang sa kahinay, putol-putol o walay kalidad, dunay pipila nga mahuman ra. Usa niini ang sementadong taytayan o tulay sa Barangay Lampianao, distrito sa Calinan.
Kini ang tulay nga nagkutay sa Ikaduhang Distrito ngadto sa Ikatulong Distrito sa dakbayan.
Dugay ko na kining nadunggan nga plano nga laing agianan padulong sa Calinan pinaagi sa Buhangin-Mandug road apan natuman kini sa tuig 2016.
Karong adlawa, pormal nga ablihan ang tulay ni Mayor Inday Sara, kauban ang duha ka kongresista sa District 2 ug 3, ug mga sakop sa Sangguniang Panlungsod.
Naatol usab kini sa Araw ng Barangay Lampianao nga usa sa pinakagamay nga barangay sa dakbayan nga may gibana-banaang populasyon nga dul-an 900.
Hapit dili madayon ang inagurasyon ug pagdawat sa proyekto gikan sa kontratista karong adlawa tungod sa dakong baha niadtong Disyembre 22 nga dala sa Bagyong Vinta nga nagkusokuso sa Visayas ug pipila ka lugar sa Mindanao. Naputol ang usa ka bahin sa tulay nga wala masemento kay nabanggaan sa daghang kahoy nga naanod sa baha.
Ang resulta kay usa ka bulan nga dili maagian ang maong tulay ug ang mga estudyante sa Gregorio Tajo National High School nga taga Barangay Pangyan kinahanglang motabok sa tubig sa Davao River aron makatungha.
Problema sab sa mga magpapatigayon ug trabahante nga napurwesyo sa maong hitabo. Matud sa mga eksperto, usa sa nakapasamot sa problema mao ang pagmabaw sa Davao River nga nakapahinay sa dagayday sa tubig ug nikankan sa yuta sa daplin sa suba.
Daghang pribadong yuta nga gikaon sa tubig busa gikinahanglan palawman ang suba pinaagi sa gitawag nga proseso sa "desilting" ug pagtukod og dike o "river control" sa maong lugar.
Kung dili kini buhaton, seguradong ang taytayan sa Lampianao na ang kaunon sa tubig.
Salamat na lang sa daling aksiyon sa Department of Public Works and Highways (DPWH), City Engineering Office ug lokal nga kagamhanan sa Barangay sa Lampianao ug Pangyan ug natabang nga maalibyohan ang problema.
Apan kung dili kini i-desilt, mobalik ra gihapon ang problema busa may dako nga infra-project karon ang DPWH sa pagprotekta sa maong taytayan.
Nihatag usab og pasalig ang Solid Sandrock Aggregates, usa ka pribadong patigayon nga may propedad sa Lampianao nga mo-ayuda sa gobyerno alang niini
Motugpa ang helicopter ni Mayor Inday sa helipad sa Solid Sandrock ug modiretso gilayon siya sa pag-abli sa taytayan sa Lampianao nga nagsaulog sa kasumaran sa ilang barangay. Malipayong pagsaulog!