GIPATAPSINGAN sa host Los Angeles Lakers ang Charlotte, 99-97, nga maoy naghatag ni Phil Jackson nga maoy coach sa Lakers nga adunay pinakadagha’g daog.
Sa iyang ika-545 nga kadaugan, naapsan ni Jackson ang 534 nga daog ni Pat Riley. Gawas niini, aduna usab siyay unom ka titulo sulod sa siyam ka seasons sa Chicago ug laing upat ka championship rings ang nadugang sa iyang unang siyam ka tuig sa Lakers.
Si Andrew Bynum adunay 17 puntos, ug 14 ka rebounds samtang si Lamar Odom mipuga og 19 alang sa Lakers kinsa mibalik na gikan pa sa ilang ikawalo nga biyahi ug aron mapausbaw ang ilang best home nga 24-3 nga record nga gibuwakbuwakan og walo ka sunodsunod nga kadaugan sa Staples Center.
Ang Phoenix Suns mipakli usab sa ilang season-high ug ikaupat nga sunodsunod nga kadaugan pinaagi sa 109-97 batok sa Denver. Ila usab nga napahamtangan og talasaong kapildihan sulod sa ilang korte ang Denver.
Nangulo si Amare Stoudemire ug 20 puntos ug 17 ka rebounds ang nalangkat niini samtang midugang si Jason Richardson og 20 alang sa Suns.
Nalupig sa Utah Jazz ang Trail Blazers, 118-105, ug gipabugnaw sa Boston Celtics ang Miami Heat, 107-102.
Nangahadlok ang Hornets dihang midugdog ang Thunder, 103-99, ug gipangdagit sa Hawks ang Clippers, 103-97.
Didto sa Dallas, mipakli og 21 puntos si Jason Terry, 20 usab ang nadugang ni Dirk Nowitzki aron buntogon ang Warriors, 110-101.
Gipaampo usab sa San Antonio ang Sacramento Kings, 115-113, ug giputlan sa Sixers og sungay ang Bulls sa overtime, 106-103.
Ang Knicks mipatidpatid sa Wizards, 107-85, ug gikuniskunis sa Raptors ang Nets, 108-99.