Al-ag: ‘Mo-give way ko’

BISAN og sa tan-aw ni Davao City Vice Mayor Bernard Al-ag nga wala pa nadeklara kagahapong adlawa sa Hugpong ng Pagbabago (HNP) kung kinsa ang mopapili pagka bise mayor sa 2019 midterm elections, mihatag gayod siya og dalan kung si kinsa man ang mahimong sunod nga bise mayor.

Kini ang gibutyag ni Al-ag diin suma niya nga nakadesisyon na siya nga di na magpapili human gipahibalo nga dunay interesado modagan sa maong posisyon gikan sa pamilya sa presidente apan wa pa kini maklaro kung kinsa.

"Mo-give way ko, apan magpadayon gihapon ta sa atong panerbisyo diha sa katawhan, kay naa naman kana sa atong kasingkasing bisan pa niadto," sulti ni Al-ag.

Gipasalig sa bise mayor nga magpadayon ang iyang panerbisyo gikan sa maayong mga nasugdan ug giagni ang katawhan nga di mauwaw moduol kaniya sa mga mulo ug sa mga serbisyo.

Si Al-ag magpabiling bise mayor sa Davao City hangtud Hunyo 30, 2019. (Richy Nalagon)