DAVAO DEL SUR -- Gironda sa hiniusang puwersa sa kapulisan ug militar ang komunidad sa Bangsamoro diin nagpuyo ang giingong magsuong lider sa Dawlah Islamiyah, nga gialegar nga kaalyado sa Islamic State of Iraq and Syria (ISIS) ug tigpayuhot ug ilegal nga mga armas, alas 11:20 sa gabii, Dominggo.
Gibutyag ni Senior Supt. Ferlu Silvio, police provincial director nga gisilbi sa kapulisan ang search warrant sa gipuy-an sa mga suspek didto sa Barangay Aplaya, Hagonoy sa probinsiya human namonitor ang ilegal nga pagpayuhot niini sa tag-as nga kalibre sa armas.
Apan atol sa operasyon napatay ang magsuon nga sila si Norhan ug Norton Delangalen kinsa maoy giingong lider sa maong grupo.
Sumala pa nga misukol sa kapulisan ug militar ang mga nahisgutan hinungdan nga napusilan ug diha-diha namatay si Norhan samtan si Norton nakabsan sa kinabuhi samtang padulong sa balay tambalanan.
Nasayran nga naghiusa ang puwersa sa Davao del Sur Police Provincial Office, Criminal Investigation and Detection Group (CIDG) ug ubang ahensiya sa kapolisan, lakip na ang militar.
Narekober nila ang usa ka kalibre .45 pistola, magazine nga adunay unod ang unom ka buhing bala, duha ka granada, mga himan sa improvised explosive device (IED) ug duha ka bandera sa ISIS.
Samtang, gibutyag ni Chief Insp. Francis Sonza nga ang Dawlah Islamiyah, dili direktang kaalyado sa grupong ISIS apan suportado niini ang teroristang grupo.
Nagplano matud pa ang Dawlah nga mohimo og teroristang kalihukan dinhi sa Southern Mindanao.
Hinuon, hugtanong gilimod sa pamilya sa mga napatay ang pasangil sa mga awtoridad. (OBD)