LAGMIT nga ang batan-ong Duterte nga si Sebastian “Baste” Duterte ang modagan nga magpapili pagka-bise mayor sa Davao City karong 2019 midterm elections.
Apan gibutyag ni Davao City Mayor Sara Duterte-Carpio nga ilaha pang tun-an ug hisgutan sa iyang pamilya ug sunahon pag-usab si Baste kung gusto ba kining mosulod sa politika isip pagka-bise mayor sa Davao City.
Gidugang sa mayor nga mahibal-an ang desisyon ni Baste sa ulahing adlaw sa filing sa certificate of candidacy (COC) ugmang adlawa.
Mingaw pa sab si ABC President January Duterte nga una nang giduso sa mga kapitan sa Davao City nga padaganon pagka-bise mayor.
Apan alang kang 'January for May 2019 Movement' prime mover ug Brgy. 23-C Kapitan Alimoden 'Wating' Usman nga kung di mopapili si January, abli sila sa pagsuporta kang Baste.
Ang mga Dabawenyo nagtuo nga sa ulahing adlaw sab mo file og COC si January Duterte, ang asawa ni kanhi Davao City Vice Mayor Paolo Duterte, apan ang daganan niini dili pagka-bise mayor kundi pagka-mayor.
Mahimong mabalhin ang COC ni Mayor Sara ngadto sa pagka-Senador pinaagi sa pagsubay sa mga lagda sa Commission on Elections (Comelec) alang sa substitutions.
Posibleng mahitabo nga si Mayor Sara sa pagka-Senador, si January sa pagka-Mayor, si Baste sa pagka-Bise mayor ug si Pulong ang sa pagka-representative sa 1st district sa Davao City.
Nakatakda sab nga masayran kung moatbang ba si PBA Partylist Rep. Koko Nograles batok kang Pulong pinaagi sa pag-file niini sa COC sa ulahing adlaw.