NANGAYO og pasaylo ang representante sa Siycha Transport Corp. (STC) ngadto kang Senador Ronald "Bato" Dela Rosa sa gihimo sa usa sa ilang mga drayber.

Si Michael G. Canabe, officer-in-charge for operations sa STC, niingon atol sa interbyu sa media sa Land Transportation Franchising and Regulatory Board-Davao Region office (LTFRB-Davao) Huwebes sa buntag, Abril 25, 2024, nga nangayo sila og pasaylo tungod sa binuhatan sa usa sa ilang mga drayber ug dili nila tuyo nga gub-on ang imahe sa Davao City.

“Kay Senador Dela Rosa, mangayo lang pud mi og apology sa nahitabo, dili man pud gyud namo intention nga gub-on ang image sa Davao,” ingon ni Canabe.

Sulti ni Canabe nga human makita ang nag-viral nga post, gihangyo dayon nila ang nasayop nga drayber nga moadto sa ilang opisina ug ipasabot ang sitwasyon.

Ang drayber niingon nga sa dihang gikan sa airport paingon sa Acacia Hotel, ang drayber giingong misulti sa pasahero nga dili sila moagi sa dalan subay sa Damosa, nga mao ang labing mubo nga rota paingon sa hotel tungod sa kahuot sa trapiko, ug moagi sa laing rota sa El Rio.

Ang giingong drayber miadto na sa Ecoland Police Station aron i-file ang iyang police blotter aron iyang mapasabot ang iyang habig sa istorya.

Dili hinuon kombinsido si Canabe sa rason sa drayber nga niingon nga naghuot ang dagan sa trapiko sa Damosa, sanglit ang pasahero misakay sa taxi mga alas 9 ngadto sa alas 10 sa gabii ug ang kadalanan sa Davao City dili kaayo huot sa peak hours.

Matod niya nga wa na nila makontak ang drayber sukad Miyerkules sa gabii, apan ilang pahamtangan og silot ang drayber sa iyang gihimo.

Ang drayber gi-hire sa STC niadtong Nobyembre 11, 2023, sa wala pa magtrabaho sa kompanya.

Ang drayber nagtrabaho sa ubang mga kompanya sa taxi ug kaniadto usa ka drayber sa gawas sa nasud.

Si Atty. Ernest Benz Davila, legal officer sa LTFRB-Davao, niingon nga moluwat sila og show cause order ngadto sa operator ug hatagan sila og higayon nga makapasabot sa sitwasyon.

Matod niya nga ilang giawhag ang drayber nga mopatim-aw aron iyang mapasabot ang iyang habig, ug kon makakitag igong ebidensiya ang ahensya hayan pahamtangan sila og silot.

Matud pa ni Davila nga pipila sa mga kalapasan nga atubangon sa drayber mao ang paglapas sa kondisyon sa prangkisa o kapakyas sa paghatag og luwas ug kasaligan nga pampublikong transportasyon.

Matod niya nga P5,000 ang multa sa unang paglapas, P10,000 sa ikaduhang paglapas, ug P15,0000 sa ikatulo ug sunodsunod nga kalapasan.

Gikan sa Enero hangtod Abril 2024, ang LTFRB-Davao nakatala og dul-an sa 19 ka report gikan sa ilang Facebook page ug online reports sa overcharging sa tanang denominasyon sa public utility vehicles (PUV) sa Davao Region.

Nakatala usab ang ahensya og tulo ka pormal nga reklamo tungod sa overcharging sa ilang buhatan.

Ang buhatan nakatala og mga kalapasan alang sa overloading, badlungon nga mga drayber, ug pagdumili sa paghatod sa mga pasahero.

Nitumaw ang isyu dihang nag-post si Senador Dela Rosa og hulagway sa reklamo sa usa ka pasahero bahin sa taas nga pletehan sa usa ka taxi driver nga taga Davao City. (JPC/RGP)

Supporters ni Mayor Sara Duterte-Carpio

Trending

Just in

Branded Content