DAGHAN ang nagtuo nga si SPO1 Adonis Dumpit usa sa nangulo sa mga vigilantes dinhi sa dakbayan sa Sugbo.

Apan sa dihang nasikop si Dumpit, nipahayag siya nga nga supak diay siya sa summary execution.

Click here for stories and updates on the Sinulog 2010 Festival.

“Supak man na sa among organization kay naa man tay due process of law. Dakpan then dalhon sa hukmanan,” matod pa ni Dumpit.

Kadtong nagtuo nga si Dumpit usa sa mga vigilantes wa lang diay maka-interview niya.

***

Ang misteryuso nga kinabuhi ni Dumpit mahimong maoy nakapaikag niadtong gustong mag-vigilante.

Karon nga namahayag si Dumpit nga supak siya sa summary execution, basin mausab na ang huna-huna sa mga vigilante sa dakbayan sa Sugbo.

Lisod man gud nga ang balaod sa mga vigilante may gamiton sa kaso ni Dumpit.

**

Daghan sa akong mga higala nga mga pulis niingon nga di sila makaako nga magtan-aw sa ilang kauban nga si Dumpit nga nabilanggo.

Ang uban sa mga pulis niingon nga dali silang nitalikod kay di sila makaagwanta nga magtan-aw sa ilang kauban nga nabilanggo, labi na nga si Dumpit maoy usa sa labing daghan og mga dinakpan.

Pait sab nga ang nagdakop mag-ipon sa ang iyang dinakpan.

**

Si Dumpit gikaintapan sa mga kriminal. Pero kay duna may kiha nga gipasaka batok kaniya, angay niya nga pagatubagon kining maong kaso.

Nagpakita lang si Dumpit og kaisog sa pagtahan sa iyang kaugalingon bisan pa sa paghuna-huna nga daghan sa iyang mga dinakpan gustong makig-uban niyag selda.

Mao kana ang trabaho sa usa ka tinugyanan sa balaod. Usahay maoy ikiha aron lamang pagpakita kanatong tanan nga bisan ang tinugyanan sa balaod di mahimong mosupak sa balaod.

**

Nisibat sa Pilipinas si Senador Ping Lacson. Nahadlok sa iyang giingon nga harassment sa administrasyon.

Di man tinali kana mahitabo kon wa pa siya mahilambigit sa giingong pagpatay sa PR man nga si Bobby Dacer ug sa iyang driver.

Pero angay nga mahinumdom kita nga kadtong way sala sama kaisog sa usa ka liyon samtang kadtong sad-an mosutoy og dagan.

Kon wa siyay sala, iyang atubangon ang mga sumbong batok kaniya.

Sama ni kanhi Senador Benigno Aquinoi Jr., kon wa siyay sala mahimo pa siyang bayani sa Pillipinas.

**

Tabla na si Senador Manny Villar ug si Senador Noynoy Aquino sa katapusang survey sa Pulse Asi sa ilang lumba sa pagkapresidente sa Pilipinas.

Ang nahitabo mao nga si si Villar dunay kontrobersiya sa C-5 highway extension sa Manila. Si Noynoy dunay say iyang kaugalingong highway controversy, ang highway nga nilatas sa hacienda sa mga Aquino didto sa Tarlac.

Sa giingon pas Inigles, may the best highway wins.