PILIAY. Ugma ang katapusan nga adlaw sa pagsumitir sa certificate of candidacy (COC) sa mokandidato sa sunod tuig nga piliay kon midterm elections. Sugod niadtong Okt. 11 hangtud gahapon daghan na ang misumitir sa ilang COC sa mga opisina sa Commission on Elections (Comelec) sa lungsod, dakbayan ug sa probinsya.
Ang piliay sa Mayo 13, 2019 dili sama sa miaging piliay niadtong May 2016 nga dunay kandidato pagka presidente. Ang managan karon ang mga kandidato lokal sa nga kagamhanan, kongresista ug senador. Dili kaayo sadya tungod kay walay gipasilongan nga kandidato pagka presidente.
Apan kon ang mga bokador sa kandidato ang pasultion “happy days are here again.” Bisan tuod walay kandidato pagka presidente ang piliay sa sunod tuig apan naay daghan nga kwarta labina kon ang mga nag-atbang nga mga kandidato kwartahan aron pagseguro sa ilang kadaugan. Gawas sa galastuan sa piliay, morag apil na ang palit sa boto ani?
Kagahapon ang mga kandidato sa dakbayan sa Cebu ug sa Mandaue misumitir na sa ilang COC sa Comelec. Ang pundok ni Cebu City Vice Mayor Edgar Labella, nga nagpasakop sa PDP-Laban, nga moatbang sa pundok ni Mayor Tomas Osmeña, sa Merkoles na mosumitir sa ilang COC kay matud pa ni Torni Frank gipapungsoy kuno ni OPAV Michael Dino.
Ang piliay unya dinhi sa dakbayan sa Sugbo morag kumbate tungod kay si Labella gipaluyohan ni OPAV Dino, nga ato na nga nahibaw-an daan nga kontra sa buot ni Mayor Tomas. Anhi na to makita unya kon kinsa nila ni Mayor Tomas ug ni Dino ang ilado ug gipangga sa taga dakbayan. Mogawas na hinuon ni unya nga away nila ni Dino ug Tomas.
Kon alegre ang piliay sa dakbayan sa Sugbo tungod kay si Labella gipaluyohan ni Dino, dunay misulti na ko mas alegre ang sa dakbayan sa Mandaue tungod kay ang mag-atbang nga kandidato pagka mayor si Cong. Jonas Cortes ug Mayor Luigi Quisumbing, nga kauban kaniadto sa miaging piliay ubos sa Liberal Party.
Ang pundok ni Congressman Cortes, nga mokandidato pagka mayor sa Mandaue, mipadangat na sa ilang COC sa Comelec Mandaue city. Mosumitir pa sa COC ang pundok ni Mayor Quisumbing. Di pa usab klaro kon kinsa ang modagan pagka kongresista sa pundok ni Quisumbing. Gipalutaw ang ngan ni Dean Merong Estenzo apan mibalibad siya.
Ang di katuhoan sa mga nagtan-aw sa pulitika sa Mandaue mao ang panag-uban karon nila ni Cortes ug Lolipop Ouano-Dizon, nga modagan pagka kongresista sa siksto distrito. Sa miaging piliay, si Lolipop midagan pagka mayor ubos sa One Cebu party apan napildi siya ni Mayor Quisumbing, nga kauban ni Cortes sa LP.