NAHIMAMAT nako sa personal silang Aga Muhlach ug Bea Alonzo sa presscon sa ilang pelikulang First Time sa Star Cinema.
Ang duha nag-mall show sa Robinson’s Galleria Cebu niadtong Biyernes nga gidumog sa ilang Cebuano fans.
Bisan sa edad nga 49 bagets lang gihapon si Aga. Pero si Bea kay namiyahok maorag nikaga. Ngano kaha? Haha... Basin iyang gituyo aron di kaayo siya batan-on tan-awon itapad ni Aga. Posible?
Showing na ugma ang pelikula. Nindot kaha ni? Manan-aw mo? Ako maorag dili kay way budget. Haha...
When sadness lingers
Dinhi diay sa Cebu himuon ang pelikulang “When Sadness Lingers” nga mag-shooting na sugod ugma, Oktubre 17, nga gibituonan sa award winning actors Sylvia Sanchez ug Nonie Buencamino.
Usa ni ka advocacy film nga gi-produced sa usa ka grupo sa mga Cebuano nga gitawag og Save Inc. (Society Awareness Volunteerism Empowerment) nga nag-promote sa mental health awareness ug naghatag og libreng serbisyo sa mga pasyente.
Ang Save, Inc. gitukod ni Anne Amparo Angus, usa ka registered nurse ug program anchor sa RPN-dyKC Kusog Cebu. Si Angus usab ang nagsuwat ug nihimo sa screenplay sa maong lilas.
Christmas gift
Ang When Sadness Lingers naghubit sa estorya sa inahan nga si Agnes (Sylvia) nga nag-antos sa sakit nga schizophrenia.
Nisamot ang iyang balatian dihang gibiyaan siya sa iyang bana nga si Alfred (Noni) nga usa diay ka bading ug nikuyog sa iyang lalaki.
Matod ni Sylvia ug Noni sa ilang presscon didto sa Crossroads, Banilad niadtong Huwebes nga siguradong daghan ang maka-relate ug makapupo og pagtulun-an sa ilang heart-warming drama nga duna say temang medical.
Nitug-an si Angus nga target playdate nila karong December isip Christmas gift kuno nila sa mga pamilyang Pilipino aron mas masabtan ug molambo pa ang atong relasyon sa usa’g usa.
Traffic pa more
Maayo ra gyud nga wa ko molakaw niadtong Sabado kay niabot kuno ang traffic pagkagabii sa Wireless tungod sa pista sa Fatima sa Basak, Mandaue.
Samot na karong hinapos sa Oktubre kay pista sad sa Consolacion. Unya karong December mao na kuno ang grand opening sa higanteng mall diha sa Basak Mandaue. Mao nay giingon traffic pa more!
Samot wa na’y managan nga jeep ana inig ka gabii sa norte. Duna tingali mobiyahe pero Danao. Mokarga sila og pasahero sa Liloan, Consolacion ug Basak pero mo-plete ka’g Danao. Hahaay, paet!