MOTUO ba kamo niining mga political survey? Kon ako ang inyong pangutan-on, ako moingon nga motuo ug dili motuo. Makalibog no?

Motuo ko kon ang nag-survey usa ka legitimate ug credible survey agency sama niining Social Weather Station (SWS) ug Pulse Asia.

Dili ako motuo kon ang nagsurvey walay kredibilidad. Kining political survey, wala kiniy kalainan sa mga survey alang sa rating games sa radyo ug telebisyon. Aduna may mga haw-shiao diha nga mga survey agency.

Ang uban motuo lang sa survey kon nag-una sila. Apan kon nangiwit mo-ingon dayon nga binayran kanang maong survey ug nabayran ang survey agency. Sama sa ubang mga presidentiable.

Kon nag-una gani sila, motuo sa survey. Apan kon nangiwit, daghan dayon og komentaryo. Mao pod kana sa broadcast media.

Click here for stories and updates on the Sinulog 2010 Festival.

MAOY BASIHANAN

Ma-apektuhan ba ang resulta sa survey kon usa ka presidentiable ang nikuha sa survey agency? Para nako, dili maapektuhan.

Kay ang tumong god aning survey mao ang pagkuha sa pulso sa katawhan. Kon imo kanang i-tamper ang resulta aron pagpabor sa nag-hire o sponsor, dili mogawas ang kamatuoran. Morag imo rang gitunto ang imong kaugalingon.

Gamiton ang survey result aron pag-assess sa posisyon sa usa ka kandidato ug aron makahimo siya og lakang aron pag-improbar sa iyang imahin ngadto sa mga botante labi pa sa iyang exposure ug popularity sa publiko. Mao nay gitawag og awareness campaign.

Bisan sa mga produkto mao nay gigamit nga strategy aron mahimong popular ang produkto ug aron halinon. Sa broadcast, gamiton kini sa network o station sa re-programming.

POPULARITY

Sa mga presidentiable sila si Senador Noynoy Aquino ug Manny Villar maoy nag-una sa mga political surveys. Buot ipasabot nga sila maoy ilado kaayo sa katawhan kon itandi sa uban. Apan dili kini sabton nga sila na gyod ang modaog sa umaabot nga piniliay.

Daghang mga factor nga atong ikonsiderar nganong modaog ang usa ka kandidato. Usa na niini ang makinarya sa eleksiyon ug ingon man ang campaign funds.

Usa sa mga pangutana nganong gamay ra man ang sample o respondents sa survey. Moabot lang sa 1,200 respondents ang kuhaon sa survey. Unsa ra god nang 1,200 sa 50 million voters.

Kana god scientific man nang survey. Kon atong kuhaon ang pulso sa 50 milyones nga botante, aw, dili na lang ta magsurvey, mag-eleksiyon na lang. Pero naa ra god ninyo kon motuo ba mo o dili. Makita ra bitaw na inig eleksiyon na gyod.