DIDTO sa Makati City, nisang-at na sa ilang certificate of candidacy si Abigail Binay pagka-mayor. Iyang igsuon nga si Jejomay Erwin Binay Jr. nagplano sab nga mag-mayor.
Kon mahinayon kini magsungag ang managsuon.
Plano ba kini sa pamilya o ilaha kining tagsatagsa nga kabubot-on?
Dili kini maoy unang higayon, kana kon moduso gyud sa iyang kandidatora si Jejomar Binay Jr.
Sa miaging mga eleksiyon, daghang higayon sa bisan asang dapit sa nasod nga nagkasumpaki ang pamilya. Dunay anak nga giatbangan sa inahan, dunay amahan nga gikontra sa anak.
Taliwa niining eksena sa mga pamilya, nahimuot gihapon ang mga botanti, ilang gisuportahan ang mga kandidato nga sakop lang sa usa ka pamilya.
Tungod niini, nigara sab ang mga politikong pamilya ug nagtuo sila nga ilang pamilya ra ang maantigo modumala sa dakbayan o lungsod.
Wa man nuon gidid-an sa balaod. Bisan kinsa nga gustong moserbisyo pwede silang molansar sa bisan unsang klase nga elected position.
Apan, kining position sa pagka-mayor nga ilogan sa managsuon, labi na niadtong mga igsuon nga wa magkasungi, kana maoy dakong salikwaot.
Unsaon pagtuo sa mga botanti nga tiunay inyong pagserbesyo nga kamo mismo wa man pagkahiusa sa pamilya. Inyong kaugaligong interest ra maoy gipasuwabi.
Hangtod nalang karong Oktobre 17 ang pagsang-at og COC sa gustong mokandidato. Ang uban dugay nang nagplano nga magpapili, ang uban naaghat lang dayon.
Unsa may maayong criteria sa pagpili og kandidato kay pulos ra ba gyud sila moserbisyo kuno?
Sa akong bahin, yano ra kaayo akong requirement sa usa ka kandidato: kanang dili manigarilyo, dili moinom, dili mamalikas, dili manugal, dili hingaon og karne ug labaw sa tanan mahinadlokon sa Ginoo. Ngano man?
Kon ang tawo nga duna niining bisyo, nagpasabot kana nga maglisod siya sa pag-alagad sa publiko kay mismo iyang kaugalingon maglisod man gani siya sa pag-atiman aron mamahimsog unta.
Kining pag-inom ug panigarilyo namatud-an gyud nga usa kini sa mga hinugndan sa cancer. Kon nagbisyo ka niini, sama ra nga imong gihinayhinayan pagpatay imong kaugalingon. Naghikog ba!
Unsa may garantiya kuno nga hatagan nimo og maayong kaugmaon ang publiko nga ikaw mismo wa may maayong kaugmaon?
Dunay pagtuon bitaw, kining hingaon og karne apektado ilang panghunahuna sa paghatag og maayong judgment tungod kay mahimong ‘animalistic’ imong pangisip.
Ang kinaiya sa hayop nga kanunay nimong gikaon daw molamay sa imong lawas.
Kanang pamalikas nga “animal ka” – murag tinuod no.
Kinsa man kuno nga kandidato nga wala niining bisyoha. Murag maglisod ta og pili niini. Asa man ta mangita og modelo nga kandidato?
Basta ang importanti, ang pagkatawo sa maong kandidato, kay kanang plataporma de gobiyerno di mana pud matuman kon kwesiyonabli imong pagkatawo.