MAKATILAW na og tagam ang mga drayber og public utility jeepneys (PUJs) ug multicabs nga di molahos og biyahe sa ilang naandan nga mga rota.
Nipasidaan niini si Land Transportation Franchising and Regulatory Board (LTFRB) 7 Director Eduardo Montealto atol sa public hearing kagahapon sa hapon sa ilang buhatan bahin sa petition sa Basak-Lapu-Lapu City Jeepney Operators and Drivers Association (Balacjoda) nga nangayo og P2.50 nga provisional nga umento sa minimum nga pletihan sa PUJ.
Atol sa hearing, si Edward Natido, mamumuo, nisupak nga mahimong P9 ang minimum nga pletihan sa Sugbo kay di susama ang gilay-on sa distansya sa rota sa minimum nga pletihan sa Manila.
Siya nireklamo nga kon mahitabo nga P9 na ang minimum, magdoble na og bayad ang mga pasahero kay dunay badlungong mga drayber nga dili manglahos og biyahe sa ilang mga rota labi na kon trapik ug gabii na.
Tulo sa iyang gihinganlan nga mga rota mao ang mga PUJ nga magbiyahian og Plaza Housing-Lahug nga kutob na lang sa J.Y.; Minglanilla nga kutob na lang sa Tabunok ug Naga nga kutob na lang sa Lawaan, Talisay.
“Lala na kaayo kada gabii, di na moabot sa Plaza. Moingon ka mo-report unya ig ka ugma nana sad. So, magbalikbalik ta, sige ta og absent sa trabaho kay mo-report,” padayag ni Natido atol sa hearing.
Matod ni Montealto, duna na silay aksyon nga buhaton sa ingon niini nga problema sa kadaghan na sa mga reklamo nga ilang nadawat bahin niini.
“Ayaw kabalaka, motagam ra lagi na, motagam na sila. Di man ko anang saad-saad, sige lang pangitaan na nako na og paagi, motagam lagi na,” pasidaan ni Montealto.
Ang director nihangyo sa mga pasahero nga kon makasugat og ingon ani ilista ang plate number sa jeep, ang oras ug ang lugar diin nahitabo ug isumbong sa ilang buhatan.
Sa wala pa siya mabalhin dinhi sa Central Visayas, kanhi siya director sa LTFRB Zamboanga regional office diin gihingusgan niya ang kampanya batok sa colorum ug diin nakadawat siya og pagpanghulga, apil na dihang gilabayan og granada ang ilang buhatan, apan wa makabuto.
Sumala ni Montealto nga dili lang Investigation Report Summons (IRS) ang ilang iisyu sa masakpang drayber nga dili molahos og biyahe sa ilang rota kondili temporary operator’s permit (TOP) na aron motagam.
Siya nibutyag nga usa ni sa ilang mga naestoryahan ni Land Transportation Office (LTO) 7 Director Victor Emmanuel Caindec ug duna silay aksyon nga buhaton batok niini nga klase sa kalapasan.
“Basta nia ta sa katarungan lang, ayaw gyud mo kahadlok. Di na namo katulgan, ato nang paningkamotan nga mawala ni nia, daghan gyud kaayo na complaints,” dugang ni Montealto.
Ubos sa Joint Administrative Order (JAO) 2014-01, ang masakpan nakalapas nga nag-trip cutting kay pamultahon og P5,000 sa unang paglapas; P10,000 ug i-impound ang unit sud sa 30 ka adlaw samtang P15,000 ug kanselahon ang certificate of public convenience.
Apil sa pabayron ang mga operator sa PUJ.
Si Romeo Armamento, national vice president for the Visayas sa National Confederation of Transportworkers Unity (NCTU) ug usa ka operator og PUJ, nireklamo kay dili makiangayon nga apil sila sa pamultahon kon makalapas ang ilang mga drayber.
“So, mao nay pinakabastos nga balaud ba, sa’a ni Juan, ang i-punish si Pedro, nga unta ang drayber naa man siya’y lisensiya nganong di man aksyonan, mao nay pait ba...Wa man gyud na gitugot sa operator, way operator nga mag-violate diha sa iyang gipanumpaan nga franchise oi. Ang problema ana sa drayber gyud,” pahayag ni Armamento.
Subay sa hearing, gipamahayag ni Atty. Edwin Antepuesto, hearing officer sa LTFRB 7, nga bisan og way pormal nga nisuwat nga nipadayag og pagsupak sa gipangayo nga P2.50 nga umento sa Balacjoda, kinahanglan gihapon moduso og mga ebidensiya ang maong grupo aron suportaan ang ilang gipangayo nga usbaw.