Diputado: Ang dakong binuang

DAGHAN ang naglibog og wa makasabot sa gihimo sa PDP-Laban.

Kon basahon ang constitution and by-laws sa PDP-Laban, pagka-nindot basahon tungod kay bugtong ang PDP-Laban lang ang adunay kompleto nga lagda alang sa iyang mga opisyales og mga miyembro.

Klaro sab kaayo ang mga prinsipyo nga gisunod sa partido.

Bisan kinsa nga makabasa niini, makasulti gyod nga lahi gyod ang PDP-Laban sa ubang mga partido.

Gawas nga plantsado ang mga nindot nga mga prinsipyo, kadtong mga gusto moapil o magpasakop sa PDP-Laban adunay komedya sa acronym nga PDP - “pamahaw dalang panihapon” og ag gigamit kaniadto nga “pamahaw dalang paniudto.”

Walay kwarta ang partido mao nga ang moapil maoy mobayad sa pagkaon panahon sa meeting.

• • •

Gawas sa ubang mga kinahanglanon, gilagda sa constitution and by-laws nga kadtong gusto mosulod sa PDP-Laban kinahanglan nga mokuha og basic membership seminar (BMS) og magpasakop sa usa ka chapter -barangay, municipal, district ug provincial diin ang pinakataas nga miyembro niini pagatawgon og presidente.

Nagsugod ang kalibog sa dihang misulod si kanhi Speaker Bebot Alvarez sa partido og naghimo kini og wala’g tuo nga pagpaapil sa partido. Bisan kinsay gusto moapil, paapilon pinaagi sa pag-isa sa walang kamot og paghural. Diha gani higayon nga nagpahural kini nga nag-shorts lang.

Tungod ni Alvarez, nahimong miyembro sa PDP-Laban ang gitawag og automatic members, og wala nay BMS seminar nga kuhaon pa.

• • •

Kon pangutan-on ang Presidente sa partido sa PDP-Laban bahin niini, way klaro ang tubag bisan kon wala na kini mosubay sa constitution and by-laws sa partido.

Bisan pa niini, gipasaligan lang gihapon ang mga adunay BMS certificates nga protektado sila ubos sa constitution and by-laws sa partido.

Apan sa dihang miabot na ang panahon alang sa pag-isyo og Certificate of Nomination and Acceptance (CONA), migawas na ang tinuod nga kahimtang sa PDP-Laban.

Wala na sunda ang constitution and by-laws sanglit nawagtang man sa huna-huna sa PDP-Laban nga suportahan kadtong adunay BMS certificates.

Wala na makakuha og CONA ang mga sakop sa PDP-Laban nga adunay BMS certificate sanglit kadtong suod sa pangulo sa PDP-Laban didto sa Manila mao na man hinuon ang nakakuha og CONA.

Giilad ra man ko aning PDP-Laban, matod pa sa usa ka politiko.

Gipagasto ko nila panahon sa pag-organize sa partido sa mga lain-laing lungsod.

Gipagasto ko nila alang sa “professional fee” sa mga speakers nga gikan sa Manila, apil na ang bayad sa eroplano, sa hotel, sa ilang mga sakyanan og hasta ang pagkaon, dugang pa niini.

Gipagasto sab ko nila sa kagastohan sa pletehan og pagkaon alang sa mga gikan sa mga kalungsoran nga gustong mokuha og BMS, dugang pa.

Mogasto pa gyod ko kon dunay meeting nga ipatawag sa Manila tungod kay nagtuo ko sa mga prinsipyo sa partido.

Bisan pa sa mga paglibak sa mga politiko, isog kaayo ko nga mi-depensa sa partido og nagpasalig nga makakuha og CONA og makahatag og CONA alang sa mga sakop sa partido sa probinsiya.

Apan, dugang pa niini, naunsa bang pagka-unsaa nga gitalikdan man lang ko sa PDP-Laban?

Aduna tuod koy CONA apan ang akong mga sakop wala na man hinuon makakuha. Mag-unsa man ko kon ako dunay CONA pero wa mahatagi og CONA ang akong mga sakop, pangutana sa politiko.

Binuang man ning ilang gihimo. Naulawan ko sa akong mga sakop, nausik ra pod ang akong dakong nagasto alang sa PDP-Laban, matod pa sa politiko.

Leksiyon na ni natong tanan, paapas sa politiko.

Dili kasaligan ang PDP-Laban og angay lang nga magbantay na ang mga katawhan niining dakong binuang nga gihimo sa PDP-Laban, panapos sa politiko.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph