KON way kalit nga kausaban, karon ang tagal sa pagpangdawat og Certificate of Candidacy (COCs) sa Commission on Election (Comelec) gikan sa kandidato sa pagka senador ngadto sa pagka konsehal sa dakbayan ug kalungsoran alang sa mid-term elections karong Mayo 2019.
Ning higayona, ang kamada sa mga kandidato sa matag partido nahan-ay o klaro na. Apan may paapas ba nga makapakurat nga plastada?
Sa nasudnong posisyon, sibaw ang pagpasubli sa kasamtangang senador ug pagpamalik sa karaang pulitiko. Nag-una kagahapon sa pag-file sa COC ang kanhi kandidato sa pagka presidente apan nipadailos karon sa pagka senador nga si Mar Roxas ubos sa Liberal Party.
Uban nga motapos na sa ilang termino, nikuyog sa pag-adto buhatan sa Comelec sa ilang giindurso nga mohulip sa posisyon sama ni Sen. Antonio Trillanes III nga iyang gikauban ang laing lider sa Magdalo group.
Sa Sugbo, ang nagbitay nga mga pangutana hingpit nang matubag ning higayona. Unsay kamada sa Davide-Magpale nga tandem? Kinsay running mate ni Gwen Garcia sa One Cebu party? May laing pwersa ba kaha nga motumaw?
Sa Metro Cebu, ang alegre nga nuntan mao ang kausaban sa kamada sa pulitika sa dakbayan sa Mandaue ug Lapu-Lapu. Ning panahon pa lang sa pagsumiter sa COCs, mainiton na ang pagpabikil og istorya. Unsa na kaha kon makabuylo na ang kampanya sa eleksiyon? Hinaot nga ang matag kampo magbaton og kaabli sa hunahuna ug taas nga pasensiya aron mopatunhay gihapon ang kalinaw taliwala sa kainit sa pulitika.
Ang kausaban sa kamada sa partido ug ang init nga debate ehersisyo sa pagkagawasnon, diin ang matag usa may katungod sa pagpili sa iyang gusto ug pagtuo. Ang eleksiyon mismo nag-unang timailhan sa demokratikong kagamhanan, karon ubos sa pagpangulo ni Presidente Rodrigo R. Duterte.