DILI babag sa mga personahe sa Philippine Drug Enforcement Agency (PDEA) ang pagpang-ambush nga gikamatay sa lima ka mga personahe sa Lanao del Sur.
Kini ang gibutyag ni Special Assistant to the President (SAP) Christopher Lawrence “Bong” Go atol sa iyang pagbisita sa Cagayan de Oro ug Misamis Oriental bag-o lang.
Matud ni Go nga gimando ni Presidente Rodrigo Duterte ngadto sa mga personahe nga dili magpaapekto sa maong hitabo.
Sakit man nga mawad-an og mga sakop apan giawhag niini nga ipadayon gayud ang kampanya batok ilegal nga druga labina mas daghan sa mga Pilipino karon ang misuporta niini.
“Masakit na malagasan tayo ng limang magigiting na mga PDEA agents pero hindi ito makaapekto sa ating pumapatuloy na kampanya,” matud ni Go.
Sa kasamtangan, gipasakaan na og kaso ang 10 ka mga personahe nga gikonsiderang utok sa pagpang-ambush.
Gibutyag sab niini nga nakabisita na si Duterte sa mga haya sa mga PDEA agents ug gihatagan na usab sila og The Order of Lapu-Lapu ug Kalasag sa matag pamilya lakip ang paghatag og pinansyal nga tabang, burial ug employment assistance.
Gimandoan usab ang mga personahe sa PDEA sa Mindanao nga magbinantayon.