MOSUGOD na karong adlawa ang 2018-19 season sa National Basketball Association (NBA) diin usa ang misyon sa laing 29 ka partisipanteng teams – lumpagon ang gingharian sa back-to-back champions Golden State Warriors.
Ang Warriors mosugod sab dayon sa ilang kampanya alang sa Three-Peat nga tinguha pinaagi sa pag-host sa Oklahoma City Thunder sa Oracle Arena.
Motunga si commissioner Adam Silver ning sangka aron itunol ang ikatulong singsing sa kampiyunato sa Warriors sa miaging upat ka mga tuig.
Mobansiwag ang laing bandera sa kampiyunato. Adunay highlights nga ipasundauyag. Unya inig ka human niini, mobalik na sab dayon ang Warriors sa sinugdanan.
Sa tinguha nga malumpag ang gingharian sa Warriors, ang ubang teams nagpalig-on sa ilang mga puwersa apan ang labing ningbaniog mao ang pagbiya na sab ni LeBron James sa Cleveland Cavaliers aron motapon sa Los Angeles Lakers.
Si Carmelo Anthony mibiya sab sa Oklahoma City ug mibalhin sa Houston Rockets diin sa iyang tan-aw, mas haom ang iyang estilo.
Mikuha sab og atensyon ang desisyon ni Dwyane Wade nga moduwa gihapon sa Miami Heat alang sa iyang ika-16 nga mga tuig sa NBA.
Ang Milwaukee Bucks gilaumang magbitbit og taas nga moral gumikan kay giablihan na ang bag-o nilang homecourt.
Adunay sab walo ka teams nga ningkuha og bag-ong coaches sa pamasin nga mausab ang dagan sa ilang kampanya.
Ang Warriors sayod nga gipangandaman sila og insakto sa ilang mga karibal hinungdan nga nangandam sab sila og maayo.
“None of us are ready for this run to come to an end,” matod ni Golden State forward Draymond Green.
“So we’ve got to continue to approach it like we’ve got zero. And that’s cliche and impossible to do, but you want to try to get as close to that as you possibly can. And that’s my mindset always entering the season.”
Dili ikalimod nga grabe gihapon ka inilog ang Warriors hilabi na kay nakakuha sila og laing All-Star nga si DeMarcus Cousins, kinsa midawat lang og $5.3 nga kontrata sa tinguhang makatilaw na siya og titulo.
Ang kombinasyon nila ni Green, Cousins, two-time MVP Stephen Curry, one-time MVP Kevin Durant ug three-point artist Klay Thompson dili gyud lalim banggaon sa bisan unsang team sa liga.
“We’ve all got one goal, man,” matod sa kasamtangang MVP nga si Rockets guard James Harden.
“You’ll keep hearing the same story over and over until I’m not here no more. We’ve got to win a ‘chip. We’ve all got the same goal. We kind of, a little bit, we kind of know what it takes to almost get there. But we haven’t gotten there yet.”
Human sa 15 ka mga tuig nga pagduwa sa Eastern Conference ubos sa kampo sa Cavaliers ug Miami Heat, si four-time MVP James nakadesisyon nga motapon sa Western Conference ug gipili niya ang Lakers nga duwaan.
Sa paghiabot ni James sa Lakers, dili ikalimod nga kalit lang nahimo nga contender ang Lakers sa West.
“I’m a basketball player. I play ball. That’s what I do and that’s what I live by. And when I do it at the level I do it at, everything else takes care of itself,” matod ni James, kinsa usa ka 4-time MVP. AP, ESL