ANG kapulisan ug Criminal Investigation Detection Group (CIDG- 12) naglutos karon sa mga suspek sa pagbanhig sa duha ka mga konsehal sa Sultan Kudarat ug Maguindanao.

Gibutyag ni PNP-12 Regional Director C/Supt. Josefino Cataluna nga ang pangulo sa mga suspek nga si Minundas Abao ug iyang mga kauban padayong gipangita sa militar ug kapulisan, gani duna na sila'y mga lugar nga gisuhid karon nga posibleng gitaguan sa grupo.

Gidugang ni Sultan Kudarat Police Provincial Director Senior Superintendent Teng Tucao Mamalinta nga si Abao konektado sa lawless Moro Islamic Liberation Front (MILF) group nga nagtagu-tago karon sulod sa Liguasan Marsh.

Di pa karon dugay, gibanhigan-patay sila si President Quirino Municipal Councilor Corazon Florida ug Pandag, Maguindanao Councilor Dindo Legawan sulod sa plantasyon sa African Oil nga gipanag-iyahan ni Councilor Florida sa nahisgutang dapit.

Samtang nasuta na sab karon sa mga otoridad ang motibo sa hitabo ug migawas nga away gyud sa luna nga gipanag-iyahan sa konsehal ang gilantaw nga motibo sa pagpamanhig. (Edgardo Fuerzas)