GITUNOL na sa iyang katapusang kapahulayan ang usa sakop sa Philippine Drug Enforcement Agency (PDEA)-Northern Mindanao nga namatay sa pagpang-ambush sa Lanao del Sur.
Si Diobel Pacinio, 29, usa ka PDEA agent, taga lungsod sa Talisayan Misamis Oriental, ang gilubong niadtong adlaw’ng Lunes, Oktubre 15.
Labihan ang kasubo sa iyang mga higala ug kaparyentihan sa iyang daling kamatayon ug nganin gihulagway na kining sa bata pa lamang niini pangandoy na niining magsilbi.
Ang kapikas niini nga si Candy kinsa mihatag og mensahe atol sa misa labihan ang dangoyngoy gumikan kay sakit alang kaniya ang pagkawala niini.
“Makaingon ko nga hero akong bana. Pero makaingon pod ko nga Lord wala man nako ni gipangayo. Mas lami gihapon nga magkinabuhi nga kauban siya bisan og lisod.” Pahayag niini.
Hangtod sa paglubong ang iyang mga kauban sa buhat nilahong niini uban sa paghalad og gun salute.
Kahinudmuman, lima ka mga PDEA Agent ang gi-ambush national highway sa Kapai, Lanao del Sur diin mga biktima sakay sa Toyota van ug pauli unta sa Marawi City.
Gikan kini sila nagpahigayon og drug symposium alang sa mga drug surrenderers sa lungsod sa Tagoloan, Lanao del Sur.
Patay dihang nahidangat sila si PDEA agents Kenneth Tabulo, Kristine Mae Torlao, Lores Joy Amar, ug Binzo Dipolla sa Amai Pakpak Medical Center sa Marawi City samtang nakabsan gihapon sa iyang kinabuhi si Diobel Pacinio. Samaran sab sila si Rachel Gentapanan ug Normina Dicay.
Ang kamatayon sa lima daw dili makababag aron ipadayon sa PDEA ug kapolisan ang giyera kontra druga.