PORMAL na nga mipasa sa iyang resignation letter si Misamis Oriental Integrated Sports Center (MOISC) general manager Prexy Elipe niadtong adlaw’ng Lunes, Oktubre 15.
Kini aron mobiya sa iyang pangatungdanan human gi-appoint isip bag-ong miyembro sa Sangguniang Panlalawigan.
Gipaabot ni Misamis Oreintal Governor Yevgeny Vincente Emano, kinsa chairman sa board sa MOISC, nga pilion pa ang mohulip niini.
Matud niini nga bisan kinsa pwedeng mahimong general manager sa MOISC apan kinahanglan lang nagbaton ug saktong kwalipikasyon.
“As long as Filipino citizen gud ka, I think more of dapat enthusiastic ka sa sports unya naa kay management skills kay its management ang importante dinha,” pahayag ni Emano sa mga sakop sa media lakip SunStar SuperBalita.
Dugang pasabot niini nga ang board of directors gilangkuban sa Department of Education, Provincial Government ug City Government nga mahimo sab nga makarekomendar kinsa ang himoung bag-ong GM.
Matag bulan adunay board meeting ug gipasalig ni Emano nga iya kining lingkoran aron mapilian kini ang angayan ihulip ni Elipe.
Samtang sa iyang bahin ni Elipe gibutyag na niini nga aduna siyay girekomendar nga OIC nga maoy naglantaw karon sa MOISC apan dili pa niini manganlan hilabina wala pa kini napili.
Sa pagpangutana sab sa SuperBalita sulod sa MOISC kon kinsa ang kasamtangan nga OIC pipila sa mga trabahante wala pa nasayod niini.