Chito E. Germino
Paknaan, Mandaue City, Cebu
KILUMKILOM. Namahuway sila si Godfrey, kumander sa kasundalohan sa Ibelen sa ika-onse nga siglo, uban sa iyang napulo ka sundalo ug sa iyang pangabaga nga nagsilbing iyang badigard. Diha sila namahuway sa daplin sa usa ka sapa. Gipanghigot nila ang ilang mga kabayo sa mga punoan sa kahoy duol nila. Nag-montar silag mga tolda alang sa usag-usa nila Layo pa ang ilang latason padulong sa Herusalem. Dia pa sila sa siyudad sa Mesena, kapin sa usa ka libo ka kilometro gikan sa Herusalem.
Unya may nadungog silang mga tunob sa kabayo gikan sa ilang nahiagian. Usa ka kabayo nga paspas kaayo ang mga tunob padulong sa ilang nahimutangan. Gibadbaran ni Godfrey sa higot ang iyang kabayo ug gisakyan aron pagsugat sa tawong miagpas nila. Sutaon niya kon unsay tuyo niini. Andam siya sa pakigkumbati kon dautan ang tuyo sa maong tawo.
Nalantawan ni Godfrey ang bayhon sa nagsakay sa kabayo. Si Vallian, ang iyang anak nga bag-o lang niyang gitug-anan nga siya (Godfrey) ang amahan ni Vallian. Iya ganing giagni nga pakuyugon niya, apan nibalibad kini. Nagduda si Godfrey nga may dautang tuyo si Vallian kaniya.
“Nganong miapas man ka? Kon gusto kang mopatay nako, bisag tiguwang na ko, di pa baya sayon!” ni Godfrey. Pintok ug prangka siyang namulong.
“Mokuyog na lang ko nimo aron di ko makastigo! Nakapatay kog pari!” ni Vallian nga gikutasan pa. Gipaurong niya ang iyang kabayo atubangan sa kabayo ni Godfrey.
“Nganong gipatay man nimo?” ni Godfrey.
“Gikawat ang kuwentas sa akong asawa. Gipabawon nako ang maong kuwentas sa iyang lubong. Naghikog man god si Rebecca tungod sa kaguol nga namatay among panganay. Salbahis ang maong pari. Gipaputol pa ang ulo sa akong asawa pagdayong lubong; unya gikawat ang kuwentas sa iyang liog. Puwerting laguta nako pagkakita sa kuwentas nga diha na sa liog ni Padre Gregory. Mingitngit ug mipula ang akong panan-aw. Giduslak nako siya sa nagbagang espada nga kong gipanday. Di unta siya madisgrasya kon wa pa ko niya hinginli. Iya man kong giatubang nga pabiyaon sa Samaria kay pamilya man ko sa naghikog!” asoy ni Vallia.
“Gikalipay nako ang maong hitabo kay makauban na nako ang akong anak ug bugtong manununod,” ni Godfrey.
“Tinuod ba nga adto ta makapangayo og pasaylo sa atong mga sala sa Herusalem?” ni Vallian.
“Nganong nakapangutana man ka ana?” ni Godfrey.
“Mangayo kog pasaylo sa akong pagpatay sa pari... ug para sab ni Rebecca nga naghikog!” ni Vallian.
“Kitang duha mismo ang moadto sa Herusalem. Kitang duha ang mosuta kon tinuod ba!” ni Godfrey. Dayon gisinyasan niya si Vallian nga mosunod kaniya.
Adto sila magpalabay sa gabii sa daplin sa sapa. (Katapusan)