HUMAN nila nadawat ang singsing sa kampiyunato sa 2017-18 season sa usa ka hamubong programa kagahapon sa Oracle Arena, ang back-to-back champions Golden State Warriors ningkayod dayon og sugod ug ilang gipangbuntog ang bisitang Oklahoma City Thunder, 108-100, sa pagsugod sa 2018-19 season sa National Basketball Association (NBA).
Atubangan sa ilang nagpunsisok nga mga dumadapig, ang Warriors tatawng ningkombati nga adunay abundang kadasig sa pagsaka sa bandera sa ikaunom nilang titulo sa kinatibuk-an.
Ang two-time MVP nga si Stephen Curry nagpakatap og 32 puntos, walo ka rebounds ug siyam ka assists aron pangulohan ang kadaugan samtang ang one-time MVP nga si Kevin Durant nidugang og 27 puntos, walo ka rebouns ug unom ka assists.
“I love who we are, game 1 of 82,” matod ni Durant. “Just keep grinding.”
Kini maoy katapusang season nga mag-host ang mga duwa sa Oracle Arena sa Oakland ang Warriors una sila motapon sa bag-o nilang panimalay nga mao ang Chase Center sa San Francisco Bay.
“It’s a great move for the organization. We know that but this place is special, so we want to make sure this is a special season,” matod ni Warriors coach Steve Kerr.
Tinguha sa Warriors nga magmabulokon ang ilang kampanya sa katapusan nilang season sa Oracle Arena, nga adunay espisyal nga luna sa ilang kasingkasing.
Bisan wala ang ilang labing sinaligan nga si Russell Westbrook, kinsa nagpaalim pa sa iyang angol, ang Thunder nakakombati gihapon og insakto sa nag-unang tulo ka quarters.
Apan sa 4th quarter, mas ningpatigbabaw ang kompleto ug gikahadlukang puwersa sa Warriors.
Giangkon ni Kerr nga wala pa sa saktong kondisyon ang iyang mga batos ug nagkinahanglan pa sila’g dugang mga semana aron hingpit nga mogawas ang ilang tiunayng ikabuga.
“We didn’t look much like ourselves. It’s not surprising either. We need a couple more weeks,” pasabot ni Kerr.
Ang Thunder gipangulohan ni Paul George pinaagi sa iyang 27 puntos.
Celtics 105, 76ers 87
Sa Boston, gipakita dayon sa host Celtics ang kapabilidad kon nganong niini pa lang ka sayo, sila na ang gilaumang maghari og Eastern Conference pinaagi sa paglampornas ang bisitang Philadelphia 76ers.
Gipangulohan sa impresibong sophomore nga si Jayson Tatum ang kadaugan pinaagi sa iyang 23 puntos samtang nidugang og 16 puntos ug 10 rebounds si Marcus Morris.
Nagsalimoang pa ang duwa sa Celtics sa 1st half apan ningbawi kini sa 2nd half aron iposte ang 18 puntos nga kadaugan.
Kini maoy labing unang higayon nga nakakompleto og usa ka duwa ang Celtics nga naa ang ilang duha ka bag-ong mga sinaligan nga sila si Kyrie Irving ug Gordon Hayward.
Ang 76ers gipangulohan ni Joel Embiid pinaagi sa iyang 23 puntos ug 10 rebounds samtang nidugang og 19 puntos ug 15 rebounds si Ben Simmons. AP