ABUNDA ang Davao Region sa nagkadaiyang rekursos naturales, sama na lamang sa Cacao, diin dinhi gikan sa dapit ang 80 porsiyento niini.
Tuod man, luyo sa Durian, nailhan na sab ang Davao sa cacao ug lamiang tsokalate, nga multi-awarded pa.
Aron mas madasig pa ang kampanya labot cacao, ug maangkon ang tumong nga mahimong “cacao capital of the Philippines” ang dakbayan, gihingusgan karon sa Department of Agriculture (DA) sa Davao Region ang ilang social media campaign sa mga cacao farms ug mga produkto gikan dinhi.
Gitawag nga “Storytelling #CacaoDavao experience,” ang DA nangusog nga mas makampanya pa ang Davao Cacao, di lamang sa nasud, apan sa kalibutan.
Gilusad kini niadtong Agosto 8, 2018 ug matapos sa Nobyembre 15 ning tuig.
Bukas ang kompetisyon sa tanan, ilabi na ngadto sa always online ug hilig sa paggamit og social media.
Subay sa mechanics, mga mosalmot gidasig nga mag-post og picture sa ilang #CacaoDavao experience with maximum of 280 characters caption, English ang gamitong caption, dayon i-post kini sa ilang social media account/s sama sa Facebook, Instagram ug Twitter.
Ang mga entries nga ipost, angay nakapublic, diin i-judge kini base sa iyang visual appeal (25 porsiyento), Compelling Narrative (25 porsiyento), Resonating Message (25 porsiyento) ug Creativity and Originality (25 porsiyento).
Ang Best #CacaoDavao Story modawat og P20,000 cash, P10,000 sab ang dawaton sa People's Choice Award ug laing P5,000 each sa lima ka consolation prize.
So unsa ang inyong #CacaoDavao story? Share na!
Sa dugang impormasyon, i-tsek ang Agri Info Davao Facebook page.