KAUBAN sa paglambo sa dakbayan sa Davao ang pagdaghan sa katawhan, sakyanan, mga dagkong building ug ang traffic sa kadalanan.
Matud ni Mayor Inday Sara Duterte-Carpio sa iyang State of the City Address nga dako ang igkatampo sa panudlanan sa dakbayan ang mga multa nga nakolekta gikan sa mga nadakpan nga malapason sa balaod sa traffic apil na ang jaywalking. Matud ni Mayor Inday mokabat sa P6.8 ka milyon ang nakolekta sa dakbayan tungod sa nagkadaiyang kalapasan sa balaod sa trapiko.
Makaingon ta nga matinumanon ang mga sakop sa City Transport and Traffic Management Office (CTTMO) sa pagpatuman sa balaod bisan pa nga dili tanan nga malapason ang nahatagan og citation ticket.
Kon pahugtan pa sa mga sakop sa CTTMO ang pagpanakop mas modako pa ang makolekta tungod sa kadaghan sa mga malapason.
Luyo niini, makaingon ta nga daghan gihapon ang mga gahi'g ulo sa atong dakbayan. Mga dayo ba sila sa atong siyudad?
Atong nahinumdoman ang mga slogan nga nagkanayon nga “Dabawenyo ka kon nagatuman ka sa balaod”. Naa pay nagkanayon, “Dabawenyo desiplinado.”
Masabot ba nga sagad sa nangadakpan mga dayo sa dakbayan?
Masabot nga nagakunhod ang pamatasan sa katawhan sa atong dakbayan gikan sa hut-ong sa mga baby boomers, generation x ug mga millennial kon balaod sa trapiko na ang hisgutan.
Mao ni ang mga multa nga sagubangon sa madakpan nga molapas. Jaywalking P100; reckless and dangerous driving P1,500; no wearing of seatbelt P300; speed limit P500; no helmet P500; no registration P500; modification of muffler sa motor P500; driving without license P500; excess passenger P500; illegal parking P500; failure to switch headlights P1,000; obstruction P500; violation of truck ban P1,000; disregarding traffic signs P500; no PUV ID P1,000; loading and unloading on undesignated area P1,000; ug driving under the influence of alcohol/drugs P500.
Dabawenyo ka man o dili angayan lang nga atong tumanon ug respetuhon ang mga balaod bisan asang dapit kay diha makita ang atong pagkatawo kon unsa kita.