KIDAPAWAN CITY -- Estudyante nga naglakaw uban sa iyang mga barkada ang namatay human gipusil sa wala mailhing mga suspek.
Nahitabo ang pagpamusil kang Aiko Jean Losis, 23, nagtungha sa Colegio de Kidapawan College, ug molupyo sa 3rd Block, Lopez Street, Barangay Poblacion sa dakbayan alas 9:04 sa gabii niadtong Martes, Oktubre 16.
Nasayran gikan kang Kidapawan City chief of police, Superintendent Ramel Hojilla nga naglakaw lang si Losis sa may Quezon Boulevard, uban ang iyang mga barkada sa dihang giduol sa duha ka wala mailhing suspek ug gipusil.
Patay gilayon ang biktima human maigo sa ulo samtang mga suspek daling miikyas sakay sa motorsiklo paingon sa Makilala sa North Cotabato.
Sumala pa nga wala mamay-ungi sa mga nakasaksi sa hitabo ang mga suspek gumikan pulos sila nakasul-ob og helmet ug kalit sab ang hitabo.
Nasayran nga sa wala pa ang pagpamusil, si Losis gikan nag-inom sa iyang mga barkada sa Avenue Store sa Sinsuat Avenue sa dakbayan ug buot unta nga mobalhin og laing balay imnanan sa dihang nahitabo ang pagpamusil.
Blangko pa ang kapulisan sa motibo sa pagpatay sa biktima. (Edgar E. Fuerzas)