MALAUMON ang pangu sa Cebu South Mini Bus Operators Association Julie Flores nga di moangal ang mga sumasakay sa pampubliko nga sakyanan susama sa mini bus sa ilang petisyon nga pasakaan og P4 ang kasamtangan nga minimum nga pletehan niini.
Samtang gikompirmar na ni Land Transporation Franchising and Regulatory Board (LTFRB) 7 Regional Director Eduardo Montealto Jr., nga sa Nobiyembre 9 na ang public hearing sa maong petisyon.
Sa regional office gihapon sa LTFRB 7 himuon ang public hearing diin ala 1 sa hapon pagahimuon ug gidasig kadtong aduna’y ikatampo ingon man angal sa maong petisyon sa pagtambong.
Si Flores nagkanayon nga ang pletehan nila sa mini bus nga anaa sa P6.50 ang minimum, ang gibasehan niini kadto pang P30 ang litro sa krudo, apan karon nisaka kini ug anaa na sa P50 matag litro.
Malaumon usab sila nga ihatag sa LTFRB ang tibuok P4 nga ilang gipangayo nga pagsaka diin kon maaprobahan, mamahimo na nga P10.50 ang minimum nga pletehan sa mini bus samtang P1.50 ang dugang alang sa matag kilometro gikan sa P1.20/km.
Gibutyag usab ni Montealto sa Superbalita Cebu nga di pa sila makaluwat og desisyon alang sa provisional fare hike sa jeepney kay nagkuha pa sila og datus sa National Economic and Development Authority (NEDA) agi og suporta sa ilang nasabutan.
Ang board gihapon sa LTFRB sa kaulohan ang modesisyon sa rekomendasyon sa region.
Nangayo karon og dugang nga P2.50 alang sa minimum nga pletehan sa jeep ang usa ka transport group diin gihimo ang public hearing niini niadtong Lunes.
Mopasakay
Samtang siyam na ka mga local government unit sa habagatan ang nisanong sa hangyo sa Cebu South Bus Terminal nga ipagamit ang ilang bus karong umaabot ‘Kalag-Kalag 2018’.
Lakip niiini ang dakbayan sa Naga, Carcar, lungsod sa San Fernando, Barili, Alegria, Oslob, Dumanjug, Ginatilan, ug Boljoon. Gamiton ang maong mga coaster/bus isip standy vehicle pananglitan magnihit ang bus sugod Oktubre 31.
Ang mga senior citizen, person with disability (PWD), mabdos, ug inahan nga nagpasuso ang prayoridad niini. HBL