MISULOD na sa politika ang tulo ka mga anak ni Presidente Rodrigo Duterte kang Elizabeth Zimmermann kon diin si Sebastian “Baste” Duterte hingpit nang misumite sa iyang certificate of candidacy (COC) alang sa pagka-bise mayor sa dakbayan sa Davao sa katapusang adlaw sa pagpayl, Miyerkules, Oktubre 17.
Human ang pila ka mga adlaw sa pagpaabot kon kinsa ang mamahimong running mate ni Mayor Sara Duterte-Carpio, si Baste miabot sa Commission on Elections (Comelec) bandang alas 12 sa udto Miyerkules. Siya gikuyogan sa iyang maguwang nga babaye.
“Naisip ko lang na I was born in Davao City. I've been to places but my heart is always here,” butyag ni Baste, ug dugang nagsulti nga gusto gyud siyang moalagad sa katawhan.
Gikanayon ni Baste nga nakig-istorya na siya sa iyang amahan bahin sa iyang plano nga modagan ug miuyon kini, apan siya ang katapusang nihukom.
“Wala naman sila [pamilya] masyadong sinabi sa akin, basta ayusin ko lang daw ang trabaho ko,” butyag ni Baste.
Samtang, giangkon ni Baste nga bisan og nagtubo siya sa pamilyang politiko, kon diin iyang amahan nahimong dugay nga mayor sa siyudad ug karon Presidente sa nasud, kuwang pa siya og kasinatian.
“Hindi ko talaga alam kung ano pa. Kasi I have never experienced anything. I was never in an office,” sumala ni Baste.
“Kung nandyan na talaga ako, seguro I can tell you what I can offer in Davao City. Pero all I can offer is my honesty, tsaka yung serbisyo talaga,” dugang pa niya.
Kahinumdoman nga naghisgut si Duterte-Carpio niadtong Lunes nga si Baste wala pa makahukom nga modagan sa maong posisyon apan nahingpit na kini Miyerkules.
Sa pikas bahin, giangkon ni Mayor Sara nga ang nahitabo sa siyudad usa ka “political dynasty” apan matud niya nga wala lang kini mahitabo dinhi o sa mismong nasud.
“We really cannot deny na, sasabihin ng mga detractors at ng opposition na this is a political dynasty. Yes, it is a political dynasty but in the sense that we are submitting ourselves to an election so it is still a democratic process,” matud ni Duterte-Carpio ngadto sa mga tigbalita susamang adlaw.
“And, masama man na magturo ng iba but it is not only here in Davao City, it's not only here in the Philippines,” tin-aw pa niya.
Kadtong gikan sa pamilyang doktor, kasagaran mahimong doktor sab. Sa samang paagi, matud ni Duterte-Carpio kadtong gikan sa pamilyang politiko mahimong politiko sab.
Sa dihang gipangutana bahin sa posibilidad nga si Paolo Duterte mahimong kongresman sa unang distrito ug Baste isip bise mayor sa siyudad, matud pa niya nga ang Davaoeños makalaum og matang sa liderato gikan kanila nga gitudlo sa ilang amahan, Presidente Rodrigo Duterte.
“They can expect that kind of leadership na tinuro sa amin ni President Duterte. Yung leadership na nakikinig sa mga tao,” pasalig niya.
“Tinitignan kung ano ang mga issues and challenges ng mga tao na dapatkailangan i-address. So that is the kind of leadership that can expect,” puno pa niya.
Samtang gitin-aw sab ni Duterte-Carpio nga wala siya magtinguha nga mosibog o mohangyo og substitusyon.
“I am very firm with the decision to be the mayor of Davao City,” pasalig niya.