DUHA ka pamilya, Radaza ug Cabahug, mitanyag sa ilang kaugalingon aron mosilbi sa mga Oponganon.
Ang magtiayon ug pag-umangkon nga Radaza nagpapili sa mga posisyon sa pagka-kongresista, mayor ug bise mayor sa dakbayan sa Lapu-Lapu human nga miduso sa ilang tagsa-tagsa ka mga kandidatura kagahapon atol sa katapusang adlaw sa filing sa certificate of candidacy.
Si kanhi kongressman Arturo “Boy” Radaza mibalik sa pagpapili pagka-mayor samtang ang iyang misis nga si Mayor Paz Radaza, kinsa anaa na sa iyang katapusang termino, mohulip sa ilang anak nga si Aileen sa Kongreso.
Ang numero unong konsehal sa Lapu-Lapu City nga si Harry Radaza ug pag-umangkon ni Arturo nagtinguha sa posisyon pagka-bise mayor.
Si Harry anak sa mitaliwan na nga manghod ni Boy nga si Atty. Frankie Radaza.
Gitug-an ni Mayor Paz nga kasamtangang mopahuway una si Aileen sa public service kay buot niini motungha ug motukod og negosyo.
Nipasabot si Paz nga tungod kay silang sakop sa pamilya nagpapili mas sayon nalang ang pagsinabtanay ug pagserbisyo sa mga konstituwente.
“It’s not just nga kami ang nagbuot but ang katawhan gusto sad mi nila,” matod ni Paz.
Si Harry, sa iyang bahin, nagkanayon nga way balaodnon nga nagpugong sa usa ka sakop sa pamilya nga magpapili sa public office itandi sa ubang nasud nga appointed nga gikan sa royal family ang posisyon nga ilang huptan.
“Diri sa ato elected man gyud ta sa katawhan. The people have a chance to elect kon kinsa ang ilang gusto nga leaders,” matod ni Harry.
Matod ni Harry nga kining ilang pagpapili haom sa ilang slogan nga “Sa Panaghiusa Mapadayon Ang Kalambuan” tungod kay nagkahiusa sila isip pamilya lakip na sa ilang grupong Team Deretso ug sa mga Oponganon.
Kagahapon hingpit nang nakaduso sa ilang COC ang grupo sa mga Radaza ubos sa Lakas CMD/Team Deretso.
Lapu-Lapu
Samtang, ang amahan ug tulo sa unom niya ka mga anak ang nagpapili sa mga tag-as nga posisyon sa dakbayan sa Lapu–Lapu human nga nakaduso sa ilang certificate of candidacy ang pamilyang Cabahug sa Barangay Poblacion.
Ang amahan nga si Prospero “Paul” Cabahug, 68, kanhi barangay konsehal sa Poblacion, ang nagpapili pagka-konsehal isip independent candidate.
Ang 37 anyos nga anak ni Cabahug nga nurse/midwife nga si Prospero Victorino “Paulo” ang nagpapili pagka–mayor samtang ang iyang mga manghod nga si Kuditah Victoria Inez, 30, pagka-bise mayor (Independent) ug pagka-kongresista ang law student nga si Karina Virginia Perpetua alyas Kwin, 27, ubos sa United Nationalist Alliance /Team Lando Patalinjug.
Di kini maoy labing unang nga nagpapili ang pamilyang Cabahug diin niadtong 2013 election si Paulo nisuway apan naparot sa pagka-kongresista atbang ni Kong. Aileen Radaza.
Samtang si Karina nga nagpangidaron pa og 22 anyos niadtong 2013 siya maoy labing batan-ong kandidato nga nagpapili pagka-mayor niadtong higayona.
“Gusto mi nga adunay kausaban sa Lapu-Lapu,” matod pa ni Paulo.
Usa sa mga gitinguha ni Paulo nga kabutangan og mga dagkong unibersidad ang dakbayan aron nga di na kinahanglan nga molabang pa ang mga tinun-an paingon sa mainland Cebu aron moeskwela ilabi na nga grabe kahuot ang traffic.
Sumala pa nga sayon ra unya ang pagpadagan sa kagamhanan tungod kay sila rang sakop sa pamilya ang magkasinabtanay kon hatagan og kahigayonan nga modaog sa piniliay.
Si Karina sa iyang bahin miingon nga kon makalingkod pagka-mayor sa siyudad buot niyang ipadayon ang mga nasugdan nga programa ug proyekto ni Mayor Paz ilabi na nga iyang napalambo ang natad sa turismo sa Lapu-Lapu.
“It was a humbling experience pagdagan nako last 2013. Mas na-appreciate nako ang pag-study sa law,” saysay ni Karina sa dihang nahinabi sa Superbalita Cebu.