Barrita: Magpale batok Garcia

NAHITABO ang wa damha sa dagan sa politika sa lalawigan sa Sugbo. Kay si kinsay nagdahom nga modailos si Gobernador Hilario “Junjun” Davide III ngadto sa pagkandidato sa pagka bise gobernador samtang si Bise Gobernador Agnes Magpale mosaka sa pagkandidato sa pagka gobernador sa eleksyon sa sunod tuig?

Daghang mga hinungdan nga gitumbok ni Davide sa iyang pagdailos ngadto sa pagkabise gobernador. Usa niini mao ang giingong “pressure” ngadto sa iyang mga dumadapig. Nabalaka siya nga ilakip ang iyang mga supporters sa listahan sa “narco-politicians.”

Apan ang maong desisyon gihimo ni Davide sa dihang midagan pagbalik si Kongresista Gwendolyn Garcia sa tersero distrito sa pagkagobernador. Naglikay lang tingali siya sa pakigsangka ni Garcia.

• • •

Sumala sa taho sa Superbalita Cebu, pareho nga undefeated sila si Magpale ug Garcia sa ilang mga political career. Si Davide, nga duna pa untay usa ka termino sa pagkagobernador, makigsangka kang Marie Daphne Salimbangon.

Si Salimbangon, anak ni Kongresista Benhur Salimbangon sa 4th district, kaslunon unta sunod buwan, apan giuswag ang kasal tungod sa iyang pagdagan isip running mate ni Garcia. Nidagan siya sa pagka-mayor sa Bogo City niadtong 2013 apan gipildi ni Mayor Celestino Martinez Jr. Nidagan siya pagka-konsehal sa Bogo City niadtong 2016, apan pildi gihapon.

Ang akong higala, ang reelectionist nga si Lapu-Lapu City Councilor Rico Amores, naghisgot bahin sa usa ka politiko nga katulo na napildi. Apan wa na kini modagan sa eleksyon sa sunod tuig kay matod pa nahurot na ang iyang termino. Pastilan.

• • •

Nagtuo si Davide nga kon si Magpale maoy mapili nga gobernador, magpadayon ang “good governance” sa lalawigan sa Sugbo. Pero matod niya, wa siya mahadlok ni Garcia nga maoy nipildi kaniya sa eleksyon sa pagka gobernador niadtong 2010.

Samtang si Magpale nagtuo nga duna siyay “fighting chance” batok kang Garcia bisan pa sa iyang panuigon. “I have a very good chance,” matod pa niya. “At 76, I am healthy. My knees and joints might crack once in a while, but my heart and mind are still young,” matod pa ni Magpale.

Di pa nato matataw ang tinuod nga hinungdan sa pagbayloay og puwesto ni Davide ug Magpale. Pero sama sa mag-unaw og landang gikan sa buli, molugdang ang landang nga himuon og binignit ug molutaw da unya ang lubo-lubo.

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph