BUGAL-BUGAL sa dakbayan ang giingong pagpapili ni kanhi Mayor Vicente “Dongkoy” Emano gumikan kay maglisod na kini sa paglakaw.
Matud ni Kagawad Zaldy Ocon sa distrito uno sa dakbayan nga susama nga nagbugla-bugal sa katawhan ang pagpapili ni Emano isip bise mayor gumikan kay sa kaniadto nga makalakaw pa kini ug sa tulo ka tuig nga bise mayor ika duha ra kini nangulo sa meeting sa konseho.
“Si Dongkoy sa makalakaw pa sa tulo ka tuig niyang pagka vice mayor ka duha ra nag preside sa karon nga di na makalakaw di na maka preside, unsaon man na nato? Di ba kaha bugalbugal nalang ning ilaha ba, mao nay ipasabot nako nga kung di na nila kaya mograhe ta,” sa pahayag ni Ocon.
Apan gibutyag ni Emano nga andam pa siya moserbisyo sa katawhan sama sa gihimo niya kaniadto nga matang sa panerbisyo.
Samtang sa iyang bahin, si Bise Mayor Kikang Uy niingon nga andam siya makig-atbang kang Emano.
“Well that is democracy, iyaha man ng katungod kay dili man gayud nato mabut-an kung kinsa ang moatbang at the end of the day katawhan ra gihapon ang mohukom, katawhan man ang matuman,” pahayag ni Uy.
Matud ni Uy nga unta pasabton sa iyang pamilya si Emano nga magpahulay aron dili na mahago.
“Hinuon wala man ta nag base sa strongest opponent kun dili ako lang gihanyag ang akong batakan nga serbisyo sa katawhan sa dakbayan,” dugang ni Uy.