DAGHAN na tingali ninyo ang nakakita sa pelikula ni Bea Alonzo ug Aga Muhlach nga First Love. Nakahigayon mig kukabildo sa duha adtong Biyernes didto sa Providore sa Robinsons Galleria.
Gibutyag sa duha nga dugay na silang nidayeg sa abilidad sa usag-usa ug nga nangandoy nga magkauban sa trabaho. Matud ni Bea nga mga 18 ka tuig siyang nagpaabot sa maong kahigayunan nga karon lang nahitabo.
Mora kunog nipormag linya ang mga bitoon aron matuman ang ilang pangandoy labina kay sa pagsugod sa pagsalida, naatol sab sa adlawng natawhan ni Bea, ni direktor Paul Soriano ug sa bosing sa Star Cinema nga si Olivia Lamasan.
Pulos nidayeg sa usag-usa si Bea ug Aga ug nga nanghinaut nga masundan pag lain nga proyekto ang First Love.
Wa kapugngi ni Bea ang pagdayeg kang Aga dihang gibatbat niini ang mga sakripisyo sa mga babaye aron pagtuman sa ilang tahas isip asawa ug inahan. Kini isip tubag sa pangutana kon unsay sekreto sa kaminyoon ni Aga nga nilungtad og 18 ka tuig.
Nagpasalamat si Bea nga gidayeg ni Aga ang kalisud sa kinabuhi sa usa ka babaye.
Matud ni Aga, ‘I married an angel (si Charlene Gonzales, kon wa pa mo kahibalo, heh!)! Maayo ka diha uy!
• • •
Opisyal na gyud nga Kapamilya Star si Regine Velasquez human kini nipirma og kontrata niadtong Miyerkules. Dugay na kining gipaabot kay bisan sa wa pa kini mahitabo, gipahibalo na nga apil siya sa mopasundayag sa Asap in Australia.
Lain sab kaayo kon apil siya sa pasundayag sa Kapamilya pero Kapuso pa siya kon hunahunaon kay wa pa kapirmag kontrata. Daghan sa mga apil sa Asap (Kim Chiu, Maja Salvador, Zsa Zsa Padilla ug uban pa) ang naghinamhinam makakanta kuyog ang Asia’s Songbird.
• • •
Morag ‘nangisog’ na ang mga mag-aawit nga Cebuano sa Tawag ng Tanghalan sa Showtime. Human malangkat ni Janine Berdin ang kampyonato sa 2nd season sa maong bangga, may mga nisulay sa ilang kapalaran aron mosunod sa iyang tunob.
Pipila niini mao sila si Ronillo Enriquez nga ni-qualify na sa finals, si Girlie Lapinid nga ni-qualify na sab sa ikaduhang semi-finals ug karong bag-o lang, si Chingkie Maylon nga defending champion sa pagsulat ko niining lindog.
Hinoon, di na man na katingad-an (di na kuno o!). Daghan na ang nihangad sa mga Cebuano nga maayo mokanta. Ang uban gani kay nihulagway sa pagkahinga-on og mais sa mga Cebuano sa pagka maayo mokanta.
May kamatuoran kaha kini? Basin.