TAKDO alas 5:00 sa hapon gisirado na sa Provincial Commission on Election (Comelec) ang ilang buhatan isip pagtapos sa katapusang adlaw sa pagduso sa sertipiko de kandidatura.
Gilangaw ang buhatan sa Comelec sa unang adlaw sa pagduso sa Certificate of Candidacy (COC) niadtong Oktubre 11 apan niadtong adlawng Miyerkules, Oktubre 16, mga alas 4:25 sa hapon miapas sa pagduso si Alberto Tamayo, lumad nga taga Balingasag, Misamis Oriental aron magpapili sa pagka Kongresista sa unang distrito sa Misamis Oriental.
Katapusang adlaw sa pagduso nagpunsisok sa buhatan sa Comelec duha ka mga partido nga mag-atbang sa eleksyon ang miduso sab og kandidatura.
Buntag nahidangat sa buhatan sa Comelec ang National Unity Party (NUP).
Si kasamtangang kongresista sa ikaduhang distrito Juliette Uy nagpapili og usab pagka kongresista samtang iyang kapikas nga si kanhi Villanueva Mayor Julio Uy nagpapili sab pagka Gobernador.
Ang kasamtangan nga Bise Gobernador nga si Joey Peleaz magpapili pagka kongresista sa unang distrito sa lalawigan samtang ang igsuon niining Sangguniang Panlalawigan Member nga si Jigjag Pelaez ang nagpapili sa pagka Bise Gobernador. Ang magsoung Pelaez nga ubos gihapon sa United Nationalist Alliance (UNA) ang kaalyado na karon sa pamilyang Uy.
Pagka board member sa ilang partido alang sa unang distrito gilangkoban nila ni Jabi Bernaldez, Junjun Lagbas, Jerry Kho, ug Atty Dante Rio samtang sa ikaduhang distrito mao sila si Boris Actub, Paquito Mortola, Rey Paduganan, Atty. Angel Lim ug Jessa Mugot.
Mga alas 3:00 sab sa hapon human sa santos nga misa diha sa Kapitolyo Provincial miduso sa ilang sertipiko de kandidatura ang Partido PaDayon Pilipino nga gipangunahan ni kasamtangan Gobernador Yevgeny Vincente Emano kinsa magpapili og balik alang sa iyang katapusang termino.
Natuldokan sab ang mga hungihong sa pagka bise Gobernador sa linya niini human ang miduso nga magpapili mao si Prexy Elipe, ang bag-ong na appoint nga Sangguniang Panlalawigan Member.
Sa unang Distrito sa pagka kongresista magpapili si Christian Unabia, anak ni kasamtangan kongresista Peter Unabia, samtang sa ikaduhang distrito si Benjo Benaldo.
Ang mga board member nga magpapili sa unang distrito gilangkoban nila ni Wiyn Militante; Virginia Dumadag; Vicente Enting Pelaez; Fredrick Khu ug Ken Uyguanco.
Samtang sa ikaduhang distrito mao sila si Boboy Sabal; Dexter Yasay; Saysay Emano; Pangky Acain; ug Nancy Madjos.
Wala pa dinhi natapos ang miapas sa pagduso gumikan kay sa katapusang si Agusto Baculio niduso sa pagka kongresista sa ikaduhang distrito isip independente.
Sa kinatibuk-an, 3 ang magpapili sa pagka kongresista sa una ug ikaduhang distrito sa Misamis Oriental, 2 sa pagka gobernador, 2 sa pagka bise gobernador, ug 20 ang magpapili sa pagka board member sa una ug ikaduhang distrito.