ANAA na sa pagkadugta ang patayng lawas sa usa ka lalaki nga napalgan sa Barangay Membuli, lungsod sa Salay, Misamis Oriental.
Giila ang patayng lawas nga mao si Danilo Composo, 40, ulitawo, residente sa Barangay Salay River II kinsa napalgan mga alas 11:15 sa buntag adlawng Martes, Oktubre 16, sa kasagbutang bahin sa dapit.
Si Police Officer 3 Lou Ballentos sa Salay Police Station nibutyag sa Sun.Star SuperBalita nga usa ka kagawad sa dapit nga mao si Leonardo Cabigon, Jr. maoy mitaho sa insidente.
Anaa na sa pagkadugta ang patayng lawas apan sa inisyal nga imbestigasyon nakita nga adunay samad dinunggaban ug samad pinusilan ang patayng lawas niini.
Ang inahan sa biktima nga si Caliopas Composo namahayag nga uwahi niyang nakita si Danilo niadtong adlawng Sabado.
Dugang ni Ballentos nga giimbestigahan pa sa pagkakaron kung unsay motibo sa pagpatay sa biktima labina nga wala man kini mga bahad nga nakadawat ug walay mga gikaaway.
Wala sab kini sa listahan sa nalambigit sa ginadili nga druga.
Niaging mga katuigan giingong aduna kini giatubang nga kaso sa pagpangawat apan wala nay lain pa gawas niini.
Ang patayng lawas gidala na ngadto sa nahibiling pamilya.