SUPERBALITA CEBU

Super Suroy: Manuroy ta sa Club Fort Med

SEMESTRAL break na usab. Panahon na usab nga magka-bonding og taas nga panahon ang mga miyembro sa pamilya, mga managhigala ug mga managhigugmaay alang sa bakasyon.

Daghang mga dapit suroyanan ang kapilian dinhi sa Sugbo aron manuroy ug maglingawIingaw.

Apan kon gusto nimo nga mag-relax, malinawon ug makauban ang kinaiyahan, dunay saktong lugar alang nimo.

Suroya ang Cebu Club Fort Med sa lungsod sa Boljoon, habagatang-silangan sa lalawigan sa Sugbo, duha ka oras ug tunga ang biyahe o mag-agad sa dagan sa sakyanan gikan sa Cebu South Bus Terminal.

Usa kini sa mga resort nga nindot suroyan tungod sa kaanindot sa palibot.

Pag-abot pa lang nimo sa lugar, mosugat na nimo ang panoramic nga view sa Bohol Strait.

Daghan usab ka og madiskobrihan nga Instagrammable nga mga hulagway sa palibot ug makapahuway ka kauban ang presko nga hangin pinaagi sa lainlaing klase sa mga punoan sa kahoy ug ang kalma nga tingog sa mga balud sa kadagatan.

Kon gusto ka og outdoor activities, mahimo kang mag-kayaking, mag-diving o mag-snorkeling labi na pipila lang ka lakang gikan sa resort mao na ang marine sanctuary diin protektado ang mga kinabuhi ilawom sa dagat.

Sanglit ang resort naa mahimutang sa Boljoon, pwede usab ka mag-hiking sa Eli Rock o moduaw sa centuries-old nga Nuestra Señora del Patrocinio de Maria Parish o mas naila nga Boljoon Church o mag whale shark watching sa silingang lungsod sa Oslob.

Kon feel nimo nga magpundo lang sa resort, adunay duha ka lawak sa karaoke ang resort sa tag P500 sa unang duha ka oras ug dugang P100 sa mosunod nga oras. Pwede usab ka magduwa og billiard sud sa resort.

Kon feel nimo maligo, magpili lang ka, sa swimming pool (may duha ka pools nga pambata ug duha ka pools nga pangdagko) o sa dagat.

Pwede usab ka magpamasahe.

Ang Cebu Club Fort Med adunay kinatibuk-ang 23 ka room accommodations: duha ka bungalow (P2,600 matag usa alang sa overnight), 16 ka row house type (P2,000 matag usa alang sa overnight) ug lima ka casitas (3,600 matag sa overnight). Kon sa mga buwan sa Disyembre hangtod sa Mayo nga maoy peak season sa resort, dugang P200 ang mapuno sa matag lawak.

Ang maong room rates alang sa duha ka hamtong ug duha ka bata nga ubos sa 7 anyos. Kon molapas sa maong gidaghanon, dugang P200 ang charge sa matag tawo ug P200 sa matag mattress.

Matag lawak kay air conditioned ug may hot ug cold nga shower.

Gawas lang sa row house type nga mga lawak, adunay TV ug refrigerator ang casitas ug bungalows.

Dako, limpyo ug nindot usab ang desinyo sa matag lawak nga konkreto apan gipahaom sa kinaiyahan gamit ang native ug lainlaing mga klase sa kahoy ang mga frame sa mga higdaanan, bintana, lamp shades, ug pultahan ug gama sa cogon ang atop aron presko ang hangin.

Mabusog usab ka sa mga pagkaon nga i-serve sa ilang restaurant sama sa ilang Italian pizza nga lutuon pinaagi sa brick oven. May pasta, sisig rice (P200), pancit canton (P150), buffalo wings (180), vegetarian pizza (P300), ug lechon kawali (P170).

Mo-serve usab og pang-international nga pagkaon ang restaurant, mag-agad sa order sa bisita.

Welcome usab sa resort ang mga bisita nga di mag-overnight sa tag P200 nga entrance fee gikan sa 8 anyos ug pataas ug P100 kon 7 anyos ug paubos.

May magamit nga open cottages sa tag P400 ug Japanese cottage sa tag P500.

Ang resort aduna usab packages alang sa mga gustong mogamit sa lugar alang sa kasal (P110,000 minimum sa 100 ka tawo kon Disyembre-Mayo ug P105,000 kon Nobiyembre-June), conferences ug team buildings.

Matod ni Jessyl Salazar, resort manager sa Cebu Club Fort Med, Inc., nga kanhi balay bakasyonan ang resort sa magtiayon nga gikan sa pamilyang Fortunato ug Medida diin gikuha ang pangan sa resort.

Nagsugod kini og abli ngadto sa publiko niadtong Agusto 2004 nga aduna pa lang duha ka bungalows hangtod nadungagan og mga lawak alang sa nagkadaghang mga bisita.


VIEW COMMENTS
DISCLAIMER:

SunStar website welcomes friendly debate, but comments posted on this site do not necessarily reflect the views of the SunStar management and its affiliates. SunStar reserves the right to delete, reproduce or modify comments posted here without notice. Posts that are inappropriate will automatically be deleted.


Forum rules:

Do not use obscenity. Some words have been banned. Stick to the topic. Do not veer away from the discussion. Be coherent. Do not shout or use CAPITAL LETTERS!

sunstar.com.ph