Secondary boys defending champion U6 nakalingkawas

ANG secondary boys defending champion Unit 6 nakalingkawas sa kulbahinam nga duwa sa iskor 25-21, 25-18 sa group eliminations aron mapabilin ang ilang kampanya sa pagdepensa og titulo sa Davao City Athletic Association (Dcaa) Meet 2018 didto sa Davao City National High School (DCNHS) Multi-Purpose Hall.

Ang maong tim gilangkuban og magduduwa sa Ateneo de Davao University diin ang Unit 6 nag-apas og tulo ka puntos apan ang Unit 8 mas gipakusgan pa ang depensa aron makarekober ug makuha ang unang set.

Ubos ni coach Dinri Yambao sa Unit 6 nga giubanan sa Assumption College of Davao ug University of the Immaculate Conception (UIC) players, napabilin ang momentum sa ikaduhang set aron maseguro ang daug.

Ang kadaugan sa Unit 6 gisundan sa pagpildi sa Unit 7 Tuesday, 25-9, 25-10.

Gipahayag ni Yambao, sa interbyu human sa duwa, “Gi-try ra namo modepensa kay diha magsugod tanan. Stop namo ang attack nila aron maka-regain mi og momentum.”

Dugang niya nga ang Unit 8 ang usa sa mga bug-at nga tim sa torneyo.

Gikan niadtong milabay nga tuig nga nahimong Dcaa champion team, upat lang ang beterano nabilin sa Unit 6 samtang ang uban bag-ohan.

“Hopefully, tuloy-tuloy na sa finals at mag-champion ulit,” ni Yambao.

Sa secondary girls, gipildi sa Unit 5 ang defending champion Unit 1, 25-23, 26-24, samtang ang Unit 4 midaug kontra Unit 7, 25-20, 25-16, ug Unit 6 gitagak ang Unit 3, 25-19, 25-10.

Samtang naka-eskapo ang Unit 6 elementary boys team sa Unit 2, 25-15, 25-20 samtang wala gipaiskor sa Unit 4 ang Unit 7, 25-0, 25-0. (MLSA)

Trending

No stories found.

Just in

No stories found.

Branded Content

No stories found.
SunStar Publishing Inc.
www.sunstar.com.ph