TUNGOD sa gilaumang pagdasok sa mga tawo nga mobisita sa mga lubong sa ilang minahal sa kinabuhi, ipakatap sa dakbayan sa Davao ang 6,570 ka mga pulis ngadto sa mga pampubliko ug pribadong sementaryo atol sa kalag-kalag.
Lakip nga bantayan ang Davao City Overland Transport Terminal (DCOTT) aron nga maseguro ang kaluwasan gikan Oktubre 30 hangtud na sa Nobyembre 4, 2018.
“The commitment of the security cluster is to provide appropriate security sa tanang sementeryo, be it public or private,” pasalig ni Angel Sumagaysay, Public Safety and Security Command Center (PSSCC) head kagahapon atol sa I-speak media forum.
Mga magbantay gilangkuban sa mga pulis sa Davao City Police Office (DCPO), Central 911, City Transport and Traffic Management Office (CTTMO), Office of the City Economic Enterprise and Development, Civil Security Unit, Bureau of Fire Protection, Regional Intelligence Committee, ug PSSCC.
Dugang mga personahe ang ipakatap sa DCOTT duha ka adlaw una ang kasaulogan kay gilauman sa dakbayan nga daghang mga tawo ang moabot sa maong higayon.
Sa Oktubre 30, 330 ka personahe ipakatap; Oktubre 31, 1,360; Nobyembre 1,2,010; Nobyembre 2, 2,010; Nobyembre 3, 630; ug sa Nobyembre 4, 230 aron nga maseguro ang kaluwasan sa publiko.
“Kung medyo daghan, naa pa gihapon tay reserves [personnel] ani [that could assist],” pasalig ni Sumagaysay.
Puno pa niya nga ilang himuon ang tanan sa pagpangandam alang sa kalag-kalag apan iya sab nga gipahimangnoan ang publiko nga ang pagpatuman di perpekto.
“Ayaw mo og expect nga perfect na ang implementation but ginahimo sa security cluster ang tanan,” tin-aw niya ug nagkanayon nga mopatuman sila og “maximum tolerance.” (LHC)