DUHA ka isla sa Sugbo lakip ang 19 ka mga barangay sa dakbayan sa Sugbo ang gideklarar karon nga rabies-free.
Sa dakbayan sa Sugbo lakip nga rabies-free barangay ang Suba, Pasil, San Roque, Sto. Niño, Pahina San Nicolas, Kalubihan, Binaliw, Agsungot, Guba, Sirao, Taptap, Adlaon, Cambinocot, Mabini, Paril, Lusaran, Tagbao, Tabunan, ug Sudlon 2.
Matod ni Cebu City Veterinarian Alice Utlang, mounom ka tuig na karong tuiga nga rabies-free ang maong mga barangay.
Lakip sa kandidato nga mamahimong rabies-free barangay ang Poblacion Pardo, Parian ug Sinsin, apan padayon pa kini karon nga gimonitor.
Ang Local Rabies Prevention and Control Committee mao ang nideklarar niini.
Samtang sa lalawigan usab sa Sugbo, gideklarar nga rabies-free ang tibuok isla sa Camotes ug ang isla sa Malapascua.
Gibutyag ni Provincial Veterinarian Mary Rose Vincoy, nga tuig 2011 pa dihang gideklarar sa National Rabies Prevention and Control Committee ang maong mga isla nga rabies-free.
Dugang ni Vincoy nga mas dali ning isla nga ideklarar kay dali ra ma monitor ug ma-maintain.
Posible ang local declaration apan wala pa mobutyag si Vincoy unsa kini nga mga lungsod.
Sa dakbayan sa Sugbo aduna’y gibanabana nga kapin 133,000 ka mga iro samtang kapin 370,000 usab ka mga iro sa Cebu Province. HBL