NIBAG-O nalang ang secretary sa Department of Social Welfare and Development (DSWD), apan wala pa gihapon ang resulta sa Malawakang Kumustahan sa beneficiaries sa Pantawid Pamilyang Pilipino Program (4Ps).
Matod sa opisyal sa DSWD 7 nga ang national office nila ang nihimo niini sa tanang mga Pantawid Beneficiary niadtong 2017.
Sa pagkakaron, aduna’y 281,840 ka mga panimalay ang Central Visayas nga na-enroll niini nga programa diin magdawtan kini og financial assistance gikan sa DSWD.
Matod ni Shalaine Marie Lucero, assistant regional director for operations sa DSWD 7, tumong sa Malawakang Kumustahan ang pagsuta kon on-time ba nga makadawat o nagdawatan sa ilang financial assistance ang mga beneficiary.
Gitan-aw niini kon nisubay ba kini o kaha kon eligible ba ang nalista sa Pantawid base na usab sa ilang mga rekisito.
Apan pasabot ni Lucero nga tungod kay ang central office ang nihimo sa maong nahulog nga validation, wala sila’y impormasyon kabahin niini ug kon kanus-a ipagawas ang lista ug kon aduny matangtang sa kasamtangan nga lista.
Tuig 2008 dihang gisugdan ang Pantawid sa Negros Oriental diin nahulog kini nga pilot area human nasuta nga usa sa labing kabus nga probinsiya ang maong lalawigan.
Tuig 2015 dihang gihunong ang pagpanglista sa mga beneficiary niini. HBL