NIMENUS ang mga niduso og certificates of candidacy (COC) sa buhatan sa Cebu Provincial Commission on Elections karong tuiga kon itandi niadtong 2015 COC filing.
Gikan sa 76 ka mga kandidato nga nipadangat og certificate of candidacy (COC) alang sa mga posisyon sa probinsiya ug district level niadtong 2015, karon nahimo na lang nga 50.
Moabot sa 42 niini ang nilansar ubos sa landong sa nagkadaiyang partido samtang dunay 8 nga independent candidates, nga gihulagway sa Comelec nga ubos usab kon itandi sa miaging mga katuigan.
Matod ni Cebu Provincial Election Supervisor Lionel Marco Castillano, posibleng wala nibutang og daghang kandidato ang nagkadaiyang partido tungod usab nagkadaiyang koalisyon o alyansa, ilabi na ngadto sa administration party.
Lakip sa gituohan ni Castillano nga nakaingon sa menos nga pagpadangat og COC sa pipila ka mga kandidato mao ang istrikto nga lagda sa Comelec batok niadtong mga wala moduso ug Statement of Contribution and Expenditures (Soce) sa niaging mga eleksiyon.
Ang Comelec mopahamtang og multa batok sa mga kandidato nga dili moduso sa ilang Soce.
Sa laing bahin, ang pagpadaplin sa kalapasan sa premature campaigning, gihulagway sa Comelec nga pabor sa mga botante. Kini aron mas maka-ila sila sa mga kandidato, ilabi na niadtong mga dili incumbent officials.
Base sa schedule sa Comelec, Marso 30 pa magsugod ang campaign period alang sa mga local nga kandidato. Apan karon nga nahibaw-an na ang mga molansar sa umaabot nga eleksiyon, dili kapugngan nga magsugod na usab sila sa pagpangampaniya.
Matod ni Castillano, walay dautan niini sanglit wala man usab kini legal nga babag. Subli niyang gihimug-atan nga kabahin lang kini sa kagawasan sa pagpadayag sa kandidato.
Alang ni Castillano, dili lang ang mga kandidato maoy makabentaha niining pagpadaplin sa kalapasan sa premature campaigning. Matod niya, ang mga botante makabenepesyo sab niini kay sayo sab nilang ma-ilhan ang mga kandidato.
Gipasabot ni Castillano nga kung sa campaign period pa magsugod sa pagpa-ila ang mga kandidato, hayan nga alkansi niini ang mga dili incumbent official sanglit mubo na lang ang ilang higayon nga makahimamat ang mga botante.
Giangkon sa Comelec nga “grey area” pa ang kalabot sa pag-apil o dili diha sa Statement of Contribution and Expenditures (SOCE) sa mga nagasto sa kandidato sa wala pa nagsugod ang campaign period.
Matod ni Castillano, kinahanglan pa usab niya kini ipaklaro sa ilang central office kay walay tataw nga lagda labot niini. AZLG