TALIWA sa sunodsunod nga pagpamatay sa Sugbo sa gidudahang mga nalambigit sa ilegal nga drugas, diin pipila ka mga pulis ang gipasanginlan nga may kalambigitan, malaumon si Cebu Auxiliary Bishop Oscar Jaime Florencio nga dunay maayo nga mahitabo human niini.
Ang obispo wala na matingala kon may mga pulis ang gipasanginlan nga nalambigit sa maong mga krimen kay matod niya, si bisan kinsa ang mahimo nga makabuhat niini.
“Because if we say from this group, it’s possible. It’s from this group, the police, or the other group, it’s possible. Posible gyud na siya. There is nothing nga maka-hinder nila to do that,” pahayag ni Florencio.
Siya nihangyo nga hatagan og higayon ang gitahasan sa pag-imbestigar sa maong mga krimen nga makatuman sa ilang tahas.
“But then ang akong kuan diha let us not be blaming who are these. Let’s work together kon kinsa to ang gisangunan nga mag-investigate ani. Let’s have that investigation come out and then tan-awon nato from there we can move on,” matod ni Florencio, apostolic administrator sa Military Ordinariate, nga nipadayag og kaalarma sa mga nahitabo nga pagpamatay sa Sugbo.
Ang Military Ordinariate maoy diyosesis sa simbahang Katoliko alang sa Philippine National Police (PNP), Armed Forces of the Philippines (AFP) ug Philippine Coast Guard (PCG).
Siya nihangyo nga hunongon ang pagbinasolay ug ang mga hungihong ug nanawagan og pagtinabangay tali sa media, simbahan, kagamhanan, military ug kapulisan aron dunay kalinaw nga mahitabo sa komunidad. Siya nanghinaot nga mapaspasan ang imbestigasyon aron makita sa mga tawo nga dunay gihimo nga mga lakang alang sa kasulbaran niini.
Sumad
Kagahapon, nag-usa ka tuig na sa sukad sa pagtaliwan sa usa sa nahimong amahan sa simbahang katoliko sa sugbo, Cebu Archbishop Emeritus Ricardo Cardinal Vidal. Usa ka santos nga misa sud sa Mausoleum sa Cebu Metropolitan Cathedral ang gihalad, agig paghandum kaniya, alas 9:30 sa buntag.
Apan awhag ni Florencio, nga gawas sa gibating’ pagkamingaw, mas maayong padayunon ang mga gisangon, gipaambit ug gitudlo ni Cardinal Vidal sa tanan. SCG, FMDD