P11M shabu nasakmit tungod sa intel report

GIILANG big-time drug player ug nalakip sa high value target sa kapulisan sa dakbayan sa Tagbilaran, Bohol nasikop sa anti-drug operation pasado alas 8 sa gabii niadtong Miyerkules.

Nadakpan si Joseph Alburadora, 43, taga CPG East Avenue, Mansasa District, Dakbayan sa Tagbilaran, nga nakuhaan og 36 ka dagkong pakete sa gituohang shabu ug laing pito ka medium packs.

Moabot ngadto sa 935 gramos ang gibug-aton niini nga gibana-bana nga mobalor ang tanan og P11 million.

Ang pagkasikop ni Alburadora pinasikad sa search warrant nga giluwatan ni Judge Sisinio Vertudazo sa korte sa dakbayan sa Tagbilaran.

Matod ni Chief Supt. Debold Sinas nga kabahin sa gihimong One Time Big Time Operation sa kapulisan sa Bohol ang pagkasikop ni Alburadora.

Gawas kang Alburadora, aduna pay kapin sa P500,000 nga balor sa drugas ang ilang nasakmit gikan sa mga drug personalities nga maoy target sa ilang anti-drug operation.

Nakakuha usab sila og siyam ka nagkadaiyang armas.

Nigawas na matod pa ang ngalan ni Alburadora sa ilang mga dakop sa nanglabay nga mga bulan. Siya matod pa ang itudlo nga maoy ilang kuhaan sa drugas.

Niadtong miaging gabii nakadawat og impormasyon ang Provincial Drug Enforcement Unit sa Bohol Provincial Police Office nga naabot ang daghang supply sa drugas kang Alburadora hinungdan nga ila kining gi serve.

“Dugay na diay ning gipaniiran. Karon lang nila nataymingan. Giuna nila ni pag-implement kay nakita nila didto nga niabot daw ang supply nga baligya mao nang naabot sa ingon ana ka dako ang drugs,” matod ni Sinas.

Subayon pa karon sa mga imbestigador kon asa magkuhaan sa iyang supply ang suspek.

Lakip sa ilang gustong mahibaw-an kon apil ba ang syudad sa Sugbo ug mga silingang dakbayan ang distribution sa iyang illegal nga drugas.

Apan nagduda ang PRO-7 nga giagi sa silingang rehiyon sa Sugbo ug Bohol ang maong mga pinakete sa illegal nga drugas sama sa Leyte ug Mindanao.

Live-in

Manag live-in gipusasan human nakuhaan og binultong drugas sa buybust operation kagahapon sa kadlawon sa Susana Compound, Sitio Molave, Brgy. Tabunok, dakbayan sa Talisay.

Sa selda mag-Pasko ang mag-live-in nga sila Si Jomar Panilagao, 47, kapuyo nga si Jocelyn Doble, 32. Si Panilagao ug Doble nadakpan sa joint operation sa mga sakop sa Provincial Intelligence Branch (PIB) sa Cebu Provincial Police Office (CPPO) ug Talisay Police Station.

Ang mga dinakpan nakuhaan og lima ka medium nga putos ug 32 ka gagmay’ng pakite nga motimbang og 26.28 gramos nga mobalor og P320,104.

Lakip sa nakuha gikan nila ang lima ka P500 nga gituohang halin sa mga kagamitan sa pagrepack sa ilegal nga drugas. Dugang taho ni GPL