WAY labot ang Central Visayas diin nasakop ang Sugbo sa P2 nga umento sa minimum nga pletihan sa public utility jeepney nga giaprobahan kagahapon sa central office sa Land Transportation Franchising and Regulatory Board (LTFRB).
Ang presidente sa Basak-Lapu-Lapu City Jeepney Operators and Drivers Association (Balacjoda) nga si Alexander Dometita nipadayag nga dili makiangayon ang gibuhat sa ulohang buhatan sa LTFRB nga nitugot sa petisyon sa grupo sa mga operator ug drayber sa kaulohan nga gisang-at niadtong Septiyembre sa miaging tuig.
Samtang ang ilang giduso nga petisyon niadtong Abril 20, 2017 nga nangayo og P1.50 nga umento sa minimum nga pletihan sa pampasaherong jeep ug amended petition niadtong Enero 19, 2018 nga nagtinguha nga mahimong P12 ang minimum nga pletihan, pulos gibasura sa LTFRB.
“Naa silay pinalabi. Nganong wala nila giapil ang Central Visayas nga pareho ra man mi mosaka sad ang gasolina dinhi. Kon mosaka gani ang gasolina sa Manila, mosaka man sab na sa tanang regions. Unya nganong sila ra man ang naay umento?” padayag ni Dometita dihang nahinabi sa Superbalita Cebu kagahapon.
Ang LTFRB nitugot nga mahimong P10 ang minimum nga pletihan sa PUJ sa National Capital Region, Central Luzon ug Calabarzon nga moepekto 15 ka adlaw human kini mapublikar sa mantalaan.
Si Metudio “Boboi” Belarmino, consultant sa Balacjoda ug tigpamaba sa Cebu Labor Coalition (Celac), namahayag nga pila na ka umento ang giaprobhan sa LTFRB sa ubang mga rehiyon, apan dinhi sa Central Visayas, dugay na wa makatilaw og usbaw ang mga pundok sa mga drayber ug operators sa PUJ.
Tungod sa kadugay, wala na sila makahinumdom kon kanus-a ang uwahing umento nga gipatuman.
“That’s unfair naman. Then ang among petisyon nga duha walay aksyon,” sumala ni Belarmino.
Karong bag-o, ang Balacjoda niduso og petisyon nga nangayo og P2.50 nga provisional nga usbaw sa minimum nga pletihan gumikan sa sunodsunod nga pagmahal sa presyo sa mga produktong petrulyo, pagsaka sa presyo sa spare parts ug maintenance sa sakyanan ug pagmahal usab sa nag-unang palaliton.
Niadtong Lunes, gidungog ang petisyon ug matod ni LTFRB 7 Director Eduardo Montealto Jr., nga ang komento na lang sa National Economic and Development Authority (Neda) 7 ang ilang gipaabot sa dili pa sila moduso og rekomendasyon ngadto sa ulohang buhatan, kon uyonan ba o dili ang petisyon sa Balacjoda ug kon uyonan, pila ang ipatuman nga umento sa minimum nga pletihan sa Central Visayas.
Niadtong Miyerkules, nangayo sila og komento sa Neda 7 kansang data kon unsa nay nahitabo sa ekonomiya sa rehiyon siyete ug kon dunay pagmahal sa presyo sa mga palaliton ug produktong petrulyo maoy gamiton sa LTFRB 7 sa paghimo og rekomendasyon.
“Gitimbang-timbang gyud na nato pati ang situation sa commuters, kay kon taas pud kaayo, dili maayo,” dugang ni Montealto kinsa nitambong og seminar sa ilang ulohang buhatan nga moluntag hangtod sa Biyernes.
Iya nang gitahasan si Atty. Edwin Antepuesto, hearing officer sa LTFRB 7, nga kon makuha na ang komento sa Neda 7, ipadala na sa ilang central office sud ning semanaha ang ilang rekomendasyon aron didto niya pirmahan.
Siya nidugang nga 80 porsyento ang kahigayonan nga maaprobahan ang ilang rekomendasyon samtang ang nahabiling 20 porsyento alang sa katapusang pagtuon sa central office.
Samtang, niduso og position paper kagahapon sa buntag, ang pipila ka mga tricycle driver sa siyudad sa Mandaue ngadto sa buhatan sa konseho sa dakbayan alang na sa paghangyo nga himuong P10 ang minimum nga pletihan sa tricycle, gikan sa P8.
Kagahapon sa buntag, samtang nag-tricycle, nagpanon ang pipila ka mga sakop sa tricycle driver’s association sa Mandaue City hall nga gikuyogan sa pipila ka sakop sa Piston Cebu nga pinanguluhan ni Greg Perez.
Ilang giduso ang ilang petisyon kang Konsehal Elstone Dabon, ang Chairman sa Committee on Transportation.