UPAT ang samdan, samtang 66 ka pasahero ang luwas dihang nagbangga ang FastCat M11 ug cargo vessel M/V Ocean United (Oceanic Shipping Lines) sa kadagatan sa Lauis Legde, Talisay City, Huwebes sa gabii.
Alas 8:45 kagabii dihang nadawat sa Philippine Coast Guard-Cebu ang impormasyon kabahin sa panagbangga tali sa duha ka sakyanan sa dagat.
Sumala ni Liuetenant Junior Grade Mike Encina ang tigpamaba sa Philippine Coast Guard Central Visayas, nga ang FastCat M11 gikan sa pantalan sa Sugbo paingon unta sa Tubigon, Bohol, sakay ang 70 ka pasahero ug 12 ka rolling cargoes, sa dihang nabangga kini sa maong cargo vessel.
Midugang si Encina nga ang mga naangol ug gidala sa ospital mao sila: Daniel Fuentes, 38; Manuel Velso Jr., 48; ug Anacleto Dico Jr., 47. Si Cary Angelo Bilga, 28, gitambalan sa PCG-Central Visayas nga medical team.
Gisusi pa sa PCG ang maong insidente, sumala ni Encina.