NODNOD sa trabaho si Belle (tinuod ngalan gitago) kay nag-inusarang nanginabuhi para makalahos sa pagtuon ang iyang mga anak human mitalikod sa responsibilidad iyang bana kay nakakita og mas batan-ong bathala, 10 ka tuig na ang milabay.

Trabaho diri, trabaho didto, buntag ug gabii. Tungod sa iyang kahago ug kakapoy inatiman sa mga bata ug nagpatong-patong nga gipangtrabaho, nataligam-an na hinuon ang pag amuma sa kaugalingon.

Way pa check-up ug iyang gibaliwala ang bogon-bogon nga iyang nakapkapan sa iyang suso hangtod kini nagsugod og sakit.

Nakurat na lang siya sa resulta sa biopsy kay duna diay siyay cancer sa suso nga nagka-anam ka dako ug nagsigi og tubo.

Nahugno iyang kalibutan sa kadismaya ug pagmahay kay uwahi na ang tanan. Stage 4 na ang cancer nga mikatap sa ubang parte sa iyang lawas. Matabang pa man unta to kung sayo pa nadiskubrihan.

Naghilak siyang misubli nako ug nanugon nga unta ang makabasa ning maong lindog maka huna-huna og paghigugma una sa kaugalingon. Pulong ni Belle, ‘love yourself before others ug ayaw gayod ibaliwala ang kaugalingong panlawas’.

Matod sa ‘Artikulo News’, kining mosunod maoy kasagarang bantayan nga simtomas sa breast cancer labi na karon nga nagsaulog kita sa ‘Pink October’:

Bogon-bogon sa totoy. Ang uban ini humok, ang uban gahi, ang uban nagpundo og nipilit and uban sab naglutaw-lutaw. Way kumo ang magpa check-up bisag wa pa’y gibati nga sakit-sakit sa susohan. Di kini angay kahadlukan kay 90% sa mga bogon-bogon sa suso di man cancerous.

Sunod ang pagburot. Tan-awa og parehas ba og gidakton sa usa ug kon nagpula o lagom ba kini. Check-apa sab ang atngal. Apil pagtan-aw ang ilukan kung wa ba magburot ang mga lymp nodes o glands sa ilawom ini.

Mas maayong magpa mammogram kada tuig labi na kung duna na daay kaliwat nga naay ingon ining sakita o subra na sa 50 ang edad.

Di exempted ang mga lalaki sa breast cancer busa di angay kompeyansahan kung dunay ma-obserbahan nga abnormal sa ilang suso.