1st international dragon boat maglumba sa Davao

DUNAY 25 ka tims ang magkontra sa 1st Davao International Dragon Boat Festival (DIDBF) sa umaabot nga Nobyembre 30 hangtud Disyembre 2 ning tuiga didto sa Davao Boat and Leisure Club Lanang, ning dakbayan.

Kini ang pahayag ni Ching Perez, organizer ug miyembro sa JCI Duwaling atol sa Davao Sportswriter Association (DSA) Forum sa 2nd floor SM City Davao Annex niadtong Huwebes, Oktubre 18.

Sumala ni Perez nga lakip sa 25 tims ang duha ka internasyunal tim gikan sa Qatar ug Bangladesh samtang 23 sa Pilipinas diin pito ka tim niini gikan sa Davao City.

Sumala pa niya nga ang bug-at nga tims mao ang Surigao Kudyaw, Tigers Surigao, Philippine Army, Philippine Navy ug Philippine Air Force.

Magkontra ang maong mga tims sa kategoryang Open small Boat, Women small boat, ug mixed standard boat diin ang tanang modaug makadawat og premyong kuwarta, medalya ug tropeyo sa torneyo nga giila sa International Dragon Boat Federation (IDBF) ug Philippine Dragon Boat Federation.

Matod pa ni Perez nga ang matigom nga pundo sa kalihukan gamiton sa Material Recovery/ Recycling Facility ug magpahigayon og coastal cleanup sa Barangay Agdao ug Matina. (Marizz Robilla-Perez)