ANG Sarbia Bowlers ang midomina human sa upat ka duwa sa Sunday Bowlers Club (SBC) Oktoberfest Mixed Bowling Tournament sa Fairlanes Bowling Center sa F. Torres Street Davao City niadtong Huwebes gabii, Oktubre 18.
Mitala og kinatibuk-an ang Sarabia og 2,222 pinfalls dayon gisundan kini sa Homer og 2,171 pins ug ikatulo ang Diagold nga miiskor og 2,170 ug ikaupat ang MJC nga mipatumba og 2,138 pinfalls.
Samtang ang mikumpleto sa top 10 mao ang MAF Tractor (2,137), JJ Dat (2,123), BAT-HAI (2,064), Petros Bowlers (1,983), YAZI (1,979) ug Five Brothers (1,978).
Ang upat ka tims nga manguna human sa six-game elimination series ang maoy magkontra sa up-the-ladder championship games sa Oktubre 23 sa torneyo nga gisuportahan sa lokal nga panggobyerno sa Davao isip kabahin sa promosyon ug pagpalambo sa isports sa duckpin bowling sa siyudad.
Kinatibuk-ang premyong P36,100 ang ihatag sa torneyo diin ang mohari mouli og P10,000 samtang ang mosunod sa mga puwesto makakuha og P8,000, P6,000 ug P4,000.
Duna sab masters kompetisyon ug indibiduwal tims nga ang modaug makakuha og P1,500 ug ang mabutang sa sunod tulo ka puwesto dunay P1,000, P700 ug P500.
Samtang ang tim nga dunay highest single ug double game dunay P1,000 matag usa ug highest pinning, highest individual average, highest individual single ug double game makadawat og P500 matag usa. (Marizz Robilla-Perez)