KINSA ba ang di ma-fall sa tsokolate? Kitang mga Pinoy mahiligon gyud baya sa tam-is mao nga bisan unsang klaseng dessert mahuna-hunaan nato sa paghimo.
Ug basta sweets, una gyud sa all-time favorite sa kadaghan ang tsokolate.
Last October 18, pormal nga gibuksan ang 5th Chocolate Festival sa The Annex sa SM City Davao.
Ang programa namugna subay sa pagtambayayong sa Cacao Industry Development Association of Mindanao (Cidami) ug SM City Davao.
Nag-unang tumong sa pagpahigayon sa aktibidad mao ang pagdasig pa sa mas daghang Dabawenyo nga mananum og cacao.
Ang Davao Region di ikalimod nga abunda sa nagkadaiyang rekursos naturales, sama na lamang sa Cacao, diin dinhi gikan sa dapit ang 80% niini.
Ug tuod man, luyo sa Durian, nailhan na sab ang Davao sa cacao ug lamiang tsokalate, nga multi-awarded pa.
Ang Chocolate Festival, maka-heaven gyud alang sa mga mahiligon og tsokolate, tungod daghan ka'g kapilian nga mga booths nga nag-highlight sa ilang mga produkto.
Luyo sa pagkaon sa mga lamiang tsokolate, may nagkadaiyang aktibidad sab ang himuon, hangtud sa Oktubre 21.
Niadtong Biyernes, Oktubre 19, gihimo ang Chocolate Kiddie Tour, diin mga bata gitudluan paunsa ang paghimo ang chocolate, gikan sa tree to bar.
Anaa sab ang Chocolate Artisans at Work, Oktubre 20, diin makat-on ka mga pinakamaayong chocolatiers ug artisans dinhi.
Ug sa Oktubre 21, anaa ang Chocolate Art, diin ma-eksplor nimo ang laing kapasidad sa tsokolate pinaagi sa lain-laing visual art expression.