HUMAN nga atong nasayran kinsa ang mga kandidato alang sa 2019 midterm elections, pinaagi sa gisumite nilang certificate of candidacy (COC), ato na sab karong isunod ang pagsusi kanila.
Tinuod layo pa ang eleksiyon kay sa Mayo 2019 pa man kini mahitabo. Apan nasayud sab kita kon unsa kadali ang pagligid sa mga adlaw ning panahona. Kay sa takulahaw lang, mokalit na og abot unya ang 2019.
Busa gihatagan ang mga botante og igong panahon aron nga makapili og mga kandidato nga takus nga saligan sa paghupot sa renda sa pangagamhanan.
Sa pila ka bulan nga pagpa-abot una ang eleksiyon, segurado kita nga makapili na og maayo ang botante gikan sa mga politiko nga buot nga mangalagad sa publiko.
Daghan kanila nagtinguha nga magpasubli sa ilang kasamtangang gihuptan nga posisyon ug ang uban gusto sab nga mobalik sa pag-alagad human mipahulay og kadali. Samtang duna say uban nga mga bagohan pa lang sa politika.
Busa naa na kanato ang paghukom isip mga mabuot nga botante. Sa mga opisyal nga kasamtangang nangalagad, angay ba silang ibalik nato sa pagserbisyo o di na?
Alang sa mga mibalik sa pagdagan, angay pa ba sab silang hatagan og laing tsansa ug pahupton og posisyon sa gobyerno?
Ug sa mga bagohan, angay na ba kaha silang saligan aron nga moalagad kanato?
Karon pa lang daan, ato nang ukyon kon unsa gyud ang ilang tinuod nga tumong nganong magpapili sila sa katawhan. Matinud-anon ba sila o nagpakaaron-ingnon lang aron nga makakuha og boto.